Kumin-a tang tlanchhuak mi pahnih man an la ni lo

Kumin chhungin Aizawl-a Central Jail atangin Jail tang mi 10 an tlanchhuak tawh a, an zinga pahnih te chu tun thlengin man an la ni lo.

Thudawn danin kumin chhung hian Central Jail atangin mi tang 10 tlanchhuak tawhin an zinga mi 8 te chu man leh an nih laiin midang 2 man an la ni lo thung a, kumin July ni 11 zanlai-a Aizawl Central Jail atanga tlanchhuak POCSo thubuai nei Lianhmingthanga (36), Thingsulthliah Hospital Area chu kar khat hnu velah man leh niin a tlanchhuahpui ruihhlo kaihhnawih a thubuai nei Malsawmdawnga (28), Farkawn chu tun thlengin man a la ni lo a. Kumin June ni 15 zan-a blanket leh mau hmanga Central Jail bang hungnaa lawn liam ruihhlo kaihhnawih a thubuai nei Lalthawmthanga (28), Zonuam Veng, Aizawl pawh tun thlengin man a la ni lo bawk.

Prison Department-a thawkte chuan Jail tang tlanchhuah chhan hi tang vengtu indaihloh vang a nih ber thu sawiin, Mizoram Prison Manual 2017-ah chuan tang vengtu, Jail Guarding Duty pakhatin mi tang 6 an veng tur a nih laiin mi pakhatin mi 200 bawr vel a veng thin ang a nih avangin kil tin an veng seng vek thin lo tih an sawi a ni.

Prison Department chhinchhiah danin, November ni 4, 2025 khan Mizoram-a lung In hrang hrang 11-ah mi tang 1,896 awmin mipa 1,664, hmeichhia 218 leh an fate mi 14 an ni a, Lung In-a leng zat aiin tang hi 673 in an tam zawk a ni. Central Jail Aizawl-ah tang tam berin mi 480 awmna turah mi 912 an tang a, District Jail Champhai in dawtin mi 105 tanna turah mi 203 an tang a, mi tang 90 lenna tura ruahman District Jail Aizawl-ah mi 151 an tang bawk a, Central Women Jail, Aizawl chu mi 96 lenna ni mah se tang 149 an awm bawk a. District Jail Lunglei-ah mi tang 109 awm thei mah se mi 138 an tang bawk a ni.