GST 2.0 kalpui a nih hnuah Chhiah hmuh a pung

Ramchhunga GST 2.0 kalpui a nih hnuah Mizoram sawrkarin GST atanga chhiah a hmuh a pung a; GST 2.0 hnuaiah sumdawng engemaw zat lakah complaint lutin, an pawisa chawi tura chhût chu cheng nuai 10 vel a tling tawh.

Taxation Department hotute sawi danin, kumin September 22 atanga India ram puma GST 2.0 kalpui a nih hnuah Mizoram chuan GST atanga Chhiah a hmuh zat a pung a; kumin August thla khan GST-ah cheng vbc. 63.79 hmuh a ni a, September thla ah ni 22 atangin GST 2.0 kalpui a ni a, hemi thla hian GST cheng vbc. 71.51 hmuh niin, vbc. 7.72 in a pung a ni. GST 2.0 vanga GST rate tlakhniam vangin sawrkarin GST a hmuh tur a tlahniam dawn anga sawi a tam thu leh tlahniam tur ni se chuan thla liamta October-ah khan GST hmuh chu tlahniam tawh tur a nih thu Taxation hotute chuan an sawi a; October thla khan GST-ah cheng vbc. 76.98 hmuh a ni a, September thla aiin vbc. 5.47-in a pung leh tih an sawi a, a pun chhoh zel an beisei thu an sawi bawk.

Taxation hotute chuan GST 2.0 hman hnuah dan zawm famkim lo sumdawng an tam thu leh complaint an dawnte an bawhzui nghal zel thu an sawi a; tunah hian sumdawng 100 dawnin GST dan an zawm famkim loh avangin cheng nuai 10 vel penalty chawi tur an neih thu an sawi a. Customer-te hnena pek tur Tax Invoice pek loh chu sumdawng te'n GST dan an zawm loh thinna tam ber a nih thu leh MGST Section 122 chu hremna an lehkhawhna tam ber a nih thu Taxation hotute chuan an sawi a. Mizoram sawrkarah thawktu leh lirthei an dil belh mek thu sawiin, dan lova sumdawngte dapchhuah hna te, chhiah pe lo leh chhiah an pek tur ang pe lova sumdawnna lian tak tak kalpuite dapchhuah hnate ngawrh zawka thawh chhoh an tum thu an sawi bawk.