Biak In hmun chhuhsak tumna nia sawi sawifiah

Mizoram sawrkar General Administration Department (GAD) chuan Assam Rifles Biak In hmun Sawrkarin Kohhran chhuhsak a tum nia tunhnaia Media-a lol ang chu thu belhchian dawl lo a nih thu a sawi.

Hemi chungchanga sawrkar thuchhuah tarlan danin kum 2002-ah Assam Rifles ram chhuahsan a nih hnua a hman dan tur - The Mizoram (Restriction on Use of Transferred Land) Act, 2002 chu a pass tawh thu leh Assam Rifles te'n an ram an lo chhuahsan tak avangin he Dan, Section 6-na hnuaiah Assam Rifles chhuahsan ram hman dan reltu tur Advisory Committee chu Sawrkarin a din thu an tarlang a. “Sawrkar chuan ama thua thuthlukna siam mai chu tha a tih loh avangin, mipui huap kim thei ang ber turin he Advisory Committee hi a din a. Recognized Political party zawng zawng aiawhte, NGO hrang hrang sawmlehpakhat aiawhte leh Department hrang hrang aiawhte telin, Chief Minister chu Chairman a ni a. He Committee hi thuneitu sang ber leh thutawp siamtu a ni,” an ti.

May 19, 2025-a Advisory Committee thukhawm chuan Assam Rifles chhuahsan ramchhunga pass nei zawng zawngte chu vantlang tana an ram thehchhuak tura ngen nise tiin mi engemaw zatin phal takin an ram te chu an hlan tawh thu leh Assam Rifles Biak In hmun pawh vantlang tana rawn hlan turin Mizoram Presbyterian Church chu ngen ve ni se tih a nih angin Synod hotute dawr turin Advisory Committee aiawh mi 3 (Pathum) ruat nghal an nih thu GAD thuchhuah chuan a tarlang a. Advisory Committee aiawhte chuan May 30, 2025-ah Kohhran hruaitute chu dawrin July 2, 2025-ah Mizoram Presbyterian Church chuan rem an tih loh thu an dawng leh tih an sawi a. July 24, 2025-a Advisory Committee Meeting neih leh ah Central YMA te'n Court-a PIL an thehluh zingah Biak In hmun pawh a tel thu dawn niin, “A tu ve ve tan pawh Court thu lo nghah rih phawt mai loh chu tih theih a awm lo nia ngaih a ni. Court thu nghah phawt mai a tul thu chu Sept. 1, 2025-ah ziakin Kohhran hruaitute hriattir an ni,” an ti a. Oct. 23, 2025-ah Mizoram Presbyterian Church chuan Biak In hmun chu thubuai zinga a tel loh thu Sawrkarah ziakin an thlen leh thu leh hemi hnu hian Advisory Committee hian an thutkhawm loh thu an tarlang bawk.

Sawrkar thuchhuah chuan Biak In hmun ram Vantlang tana hlan let tura an ngenna chhan point 4 paw tarlangin heng zingah hian Assam Gazette Notification (dated 08.08.1952)-ah Biak In hmun hi AR ram chhunga rinluh a nih thu leh Mizoram Sawrkar leh Assam Rifles te ram inhlanna MoU-ah Biak In hmun hi Assam Rifles in Mizoram Sawrkar kuta a hlan tel thu tarlangin, Mizoram Gorkha Mandir Sanchalan Samiti, Bazar Area ten Prime Minister hnenah Assam Rifles Hari Mandir chu neih zui an dil avangin Biak In hmun Kohhran hnena pek a nih chuan an tan tanfung tha tak a nih theih dawn thu te pawh tarlan tel a ni bawk.