Assam Rifles ram chhuahsan hmunhma leh building hman dilna chhawpchhuah tawh loh rel

Aizawl-a Assam Rifle chhuahsan ram hman zui dan tur ngaihtuahtu Advisory Committee thukhawm chuan Assam Rifles ram chhuahsan hmunhma leh building hman dilna lam chi chu Committee-ah chhawpchhuah tawh rih loh nise an ti.

Nimin khan Chief Minister Lalduhoma hovin Assam Rifle chhuahsan ram hman zui dan tur ngaihtuahtu Advisory Committee chu a tum 4-na atan CM Conference Hall-ah an thukhawm a, he hunah hian Chief Minister chuan he Committee hi mipui huapzo Committee a nih avangin an thutluknate chu mipui huapzo thu tluknaah an ngai tih sawiin, Committee-ah chuan a tam zawk duh dana kal thin an nih angin an thurelte hi an zavaia kutthlakna a nih thu a sawi a ni.

Advisory Committee hian an thutkhawm hmasa lamah AR ram chhuahsana mimal leh pawl, pass neite chu an pass neihte sawrkara hlan (surrender) tura ngen an rel a. Mimal leh pawl hnenah hian ngenna siamin an ngen angin mi thenkhat chuan an ram hi sawrkarah an hlanlet tawh a. Assam Rifles Biak In hmun bik chu YMA Writ Petition chhunga mi nia sawi a nih tak avangin Advisory Committee hian Court thu hi tun thlengin an la ngaichang a ni.

Canteen kual-a Hari Mandir humhalh leh hman zui theiha dah tura Mizoram Gorkha Sanchalan Samiti, Bazar Branch ten Prime Minister hnena lehkha an lo thehluh tawh chu hnukkir tura ngen turin Advisory Committee chuan an Meeting hmasa lamah khan NGO Coordination Committee a ruat a. Nimin-a thutkhawm ah hian NGO Coordination Committee chuan an hmalakna report hi an pe a. Rah tha a chhuah ngei an beisei thu an tarlang a. Advisory Committee hian NGO Coordination Committee chungah hian lawmthu an sawi a ni.

Nimin-a thukhawm hian tun hnuah chuan AR ram chhuahsan hmunhma leh building hman dilna lam chi chu Committee-ah chhawpchhuah tawh rih loh nise an ti a. An thu lo tihtluk tawh anga hmasawnna hnathawh turte chu a remchan danin sawrkarin lo thawk zui tawh se, an tih bakah a hmunhma tihhmasawnna hna (Execution of Site Plan) Nodal Department atan UD&PA Department chu an ruat bakah Advisory Committee on AR Land kalphung mipuite hnena sawifiahna thuchhuah siam nise an ti bawk.