Chite Veng Playground hawng

Aizawl Smart City Ltd., Urban Development & Poverty Alleviation Department hmalaknaa din Chite Veng Playground chu Zirtawpni khan UD&PA Minister K. Sapdanga chuan a hawng. Aizawl Chite Veng-a Playground hawnna hunah UD&PA Minister K. Sapdanga chuan khawpui hmasawnna chu UD&PA Department-te mawh-phurhna a nih angin theihtawp chhuaha hmalak zel a ni dawn tih sawiin, Mizote tan Sports chu eizawnna tlak a ni tih a takin an hmuh chho zel a, Mizo infiammi ten National Level-a Medal an dawng thinte chu Infrastructure dintu Department tan pawh hlawhtlinna ropui tak a ni tih a sawi a, nasa lehzuala Sports Infrastructure tih hmasawn zel tum a ni tih a sawi bawk.

Chite Playground siamna atana Project cost hi cheng vbc. 9.85 niin he hna thawk tur hian North East Consultancy Services (NECS) chu rawih an ni a, November 25, 2022-ah hna tanin August 27, 2024-ah thawh zawh a ni a. Payground-ah hian Phullem phah niin Pavillion sak a nih bakah mamawh hrang hrang dah a ni a, VC leh NGO te telna Committee in an enkawl zui dawn a ni.