Aizawl Tui lakna siamtha ta

Aizawl khawpui chawmna atana tui lakna, Greater Aizawl Water Supply Scheme (GAWSS) Phase III chu kumin May 26 tlai dar 5:20 vela a chawmtu Electric Transformer a chhiat vang leh Vaivakawn Zohnuai lei tlakhniamna hmunah June 2, 2025 a tui a put avanga hun engemaw chen tui pump a khaihlak hnuah Zirtawpni, Nov. 14, 2025 atang khan dan pangngaiin tui pump theih a ni leh ta a, PHE department thawktute chuan, “Phase III atanga tui pump theih loh lai khan Phase I leh II atangin kan chawm tel a ngai a. Hnianghnar a tui sem tur hian ni tin tui 40mld vel a ngai a; mahse, Phase I leh II atang hian ni khatah chawhrualin tui 28mld vel kan pump thei a. Hei vang hian mipui hnenah tui hniang hnarin kan sem thei lo a ni,” tiin tunah chuan harsatna dang a awm loh chuan hnianghnar zawka tui sem theih an in beisei thu an sawi bawk.