Naktuk-a Dampa Bial inthlan-a Duty turte an chhuak tan ta

Dampa Bial-a Assembly by-election neih tur atana inbuatsaihna chuan a vawrtawp a thleng chho mek a, nimin khan Polling Party te pawhin an Duty-na tur hmun an pan tan a ni.

Naktuk November 11, 2025 hian Dampa Bial Assembly Seat ruak hnawhkhat turin mipui ten Vote an thlak dawn a, Inthlanna-a Vote thlak turte buaipuitu tur Polling Party te tana Training hnuhnung ber chu Inrinni khan neih niin Duty turte bungraw ken turte pawh enfiah nghal a ni a, Polling Station hla zual-a duty tur Polling Party 6 te chuan nimin zing dar 9:00 khan an Duty-na tur hmun panin Mamit an chhuahsan a, heng Polling Station te hi Silsuri-I, Silsuri-II leh Silsuri-III bakah Zopui, Hnahva leh Lianbuang-a duty turte an ni. Dampa Bial-ah hian Polling Station 41 awmin chung zinga Polling Station 3- Silsuri-I, Silsuri-II leh Silsuri-III te chu Critical Polling Station niin Zopui Polling station hi ke a kal ngai a ni bawk a. Polling Party dang zawng te chuan Vawiin hian an duty-na tur hmun an pan ve leh dawn a ni.

Tarlan tawh angin Dampa Bial-a Assembly by-election lo awm turah hian National party 2- BJC leh INC, State party 2 - MNF leh ZPM bakah Unrecognised Register party MPC te'n inthlan hi an chuh a, Dampa Bial-ah hian hmeichhia vote nei mi 10,185 leh mipa vote nei mi 10,605, an vaiin vote nei mi 20790 an awm a ni.