Rel Ticket pekchhuah tam laia ILP pek tlem mak ti

Mizo Zirlai Pawl (MZP) chuan Guwahati atanga Sairang Rel ticket a full reng laia ILP pekchhuah tlem lutuk chu mak an tih thu an sawi.

Nimin-a Aizawl Press Club-a thuthar thehdarhtute an kawmnaah MZP General Hqrs. chuan niminpiah khan Sairang Rel Station tlawhin Inner Line Permit (ILP)pek chhuah dan an zirchian thu an sawi a, Sairang Rel Station chu Station a nihna tur ang la nilo tih hre reng chungin Prime Minister chu hawn tir leh Mizoram sawrkar la inpeih loh zia pawh chiang takin an hmu tih sawiin, Rel Station hawn a nih tuk September ni 14 atanga October ni 7 thleng khan ILP hi 3,852 pekchhuah tawh a ni a, kutdawh thawnkir 6 awmin Sairang ReS station an tlawh lai pawhin ILP neilo-a a ruka chhuah tum mi 30 vel lai an man chhuah thu an sawi bawk.

MZP President chuan Bairabi leh Sairang inkara Station pathum : Hortoki, Kawnpui leh Mualkhang lamah pawh Rel a tlan muang deuh a, mi tam tak an chhuk ni an hriat thu a sawi a, heng hmunah hian Police duty awm ve mah se tam tak chu ILP neilo in an chhuah ngei an rin thu an sawi a. Mizoram-a hnamdang lo lut te chu Tourist ang veka ILP pek an ni a, an lut lam chhinchhiah ni mahse an haw lam chiang taka chhinchhiah a nilo thung a, hei hian Mizoram-ah awlsam taka lut a, cham hlen ta tam tak an awm dawn tih a ti chiang hle tih sawiin, Sairang Rel Station-ah hian ILP check leh pechhuaktu Mizoram Police duty an indaih lo hle a, ILP pekchhuah chu manual a tih vek a nih avangin a la fel fai tawk lo hle a, CCTV engmah vuah a la awmlo a, Gate mumal tak siam a la nih loh bakah hungna a tha tawk lova, X-Ray Baggage Scanner khawl pawh hman theih a la ni lova, Mizoram chu ‘Dry State’ a nih angin Excise & Narcotics duty dah an ni lo bawk niin an sawi.