IT thil-a hmasawn tul tih thu Minister in a sawi

Information & Communication Technology (ICT) Minister, Dr. Vanlalthlana chuan mipuiin State sawrkar hmalakna an hman tangkai theih nana IT thila hmasawn a tul thu a sawi.

India Mobile Congress (IMC) 2025 chu niminpiah khan New Delhi-a Yashobhoomi Convention Centre-ah Prime Minister Narendra Modi chuan hawngin ICT Minister Dr. Vanlalthlana hi telin State IT Ministers' Round Table-ah a tel nghal a. IMC 2025 hawngtu Prime Minister Narendra Modi chuan India rama internet data man tlak-hniam dan te, India ram kilkhawr ber thlenga 5G connection a thlen dan te, India-in 2030-a 6G hmathlir a neih dan te a sawi a. Semi-Conductor siam kawnga hmasawn a tum dante leh Telecom leh electronics siamchhuah kawnga a hmasawnna hrang hrangte a tarlang bawk.

IT Ministers Round Table-ah hian ICT Minister Dr. Vanlalthlana chuan Mizoram in State a nih atanga State upa zawkte um phak tum a tan an nasat thu sawiin, IT kaihhnawiha Mizoram Sawrkarin theihtawpa hma a lak thu a sawi a, Opticals Ground Wire (OPWG) tih changtlun tuma internet data chak zawk neih a tum dan te, Mizoram hmun tina 4G connection thlentir tura state sawrkar hmalakna te, Bharat 3.0 hmalaknaa khaw kilkhawr ber thlenga Internet connection pek tuma hmalakna kalpui dan te a sawi a. Mipuiin State sawrkar hmalakna an hman tangkai theih nana IT thila hmasawn a tul thu leh zirna leh IT thlunzawm a tul thu te sawiin, sawrkar laipui nen tha taka state sawrkar an thawhho a tul thu a sawi bawk a ni.

IMC 2025 hi October ni 8 atanga October ni 11 chhung neih tur a ni a. State IT Ministers' Round table hi Union Communications Minister Jyotiraditya Scindia leh Minister of State Dr. Chandra Sekhar Pemmasani ten an hmanpui a ni.