MSU General Conference vawi 23-na neih mek a ni

Mizo Students' Union (MSU) General Conference vawi 23-na chu nizan hmasa khan Hnahthial Bazar Veng-a Lalnu Ropuiliani Run-ah neih tan a ni a, zanin hian a tiak ang.

Nizan hmasa a MSU General Conference Palai lawmna hun nizan hmasa a neih hi Minister PC. Vanlalruata chuan khuallian nia hmanpuiin ram hmasawn nan zirlaite chu thawhpuiah sawmin, tunlai hmasawnna hrang hrang, a bikin Rel kawng rawn lut chu a tha lam zawnga chhawr tangkaitu ni theuh turin a chah a. Periodic Labour Force Survey, August, 2025 report tarlan danin India ram pumah hna hmu lo (unemployed) chu 5.1% an nih thu leh NITI Aayog, September, 2025 report danin Mizoram-ah hna hmu lo 2.2% an awm mek thu pawh sawiin, hemi a nih avang hian zirlaite chu hmasawnna hrang hrang milin tun atangin an eizawnna turah ngaituahna an sen tan a tul thu a sawi bawk.

Khual zahawm nia he hun hmanpuitu Bialtu MLA Jeje Lalpekhlua pawhin  ruihhlo kan do tlan a pawimawh thu sawiin, Excise Department record danin kum 1984 atanga kumin thleng hian ruihhlo vangin mi 1895 in nunna an chan tawh tih a sawi a. Ruihhlo in Inchhungkhur a tihbuaite an awm tawh loh nan zirlaite chu pui turin a sawm nghal a. Zirlaite chu eng kawng pawh zawh se, harsatna leh beidawnna an la hmachhawn vek tur thu sawiin, chutah chuan beidawn loh a pawimawh thu a sawi bawk.

MSU General Conference vawi 23-na hi nimin khan chhunzawm niin chawhnu lama Vantlang Inkhawm neih chu Adviser to CM, Lalmuanpuia Punte chuan Khuallian niin a hmanpui a, Mizote chu tum mumal nei lova General line a kal vak vak lo tura chahin, Professional line kal uar a tul thu a sawi a. Chu mai bakah thiamna tak tak chherchhuah nan Skill Development uar a tul thu a sawi bawk a. Chumi tur atan chuan tunah Skill Development Incubation Centre din tura ruahmanna siam mek a nih thu leh Mizote chu ramdangte tan pawh hna zawnga an rawn kal zawkna an ni thei a a hriat thu a sawi a. Chu dinhmun thleng tur chuan zirlaite chuan Mizoram chauh thlir lovin ram dangah pawh hna zawnga, chumi hmunah chuan Mizoram tan thiamna chher chhuak a, feh chhuak ngam thin turin a chah nghal a ni.

Lalmuanpuia Punte chuan Hnahthial District-in Bialtu MLA chak tak an nei tih sawiin, Lunglei to Champhai pawh theihna tur Hrangturzo kawng pawh black top tura ruahmanna an siam dun mek thu a sawi a. Lunglei to Champhai sumo service tan Hnahthial chu kawng pawimawh tak a la nih dawn thu a sawi bawk.

Nimin-a hun hman hi MSU Vice President Roluahpuia chuan kaihruaiin nizan-a Vantlang Inkhawm neih chu Minister Prof. Lalnilawma chuan khuallian niin a hmanpui leh bawk a ni.