Hnahthial-ah DPRC building sak thar Minister in a hawng

Rural Development & Administration Department changtu Minister Prof. Lalnilawma chuan nimin khan Hnahthial-a District Panchayat Resource Centre (DPRC) Building sak thar chu a hawng.

Hnahthial Electric Veng, Rallangtlang-a DPRC Building thar hawnna hunah hian Minister Prof. Lalnilawma chuan District thar pathum zingah Hnahthial District chu DPRC building hawn hmasak berna niin Bialtu MLA hmalakna zar a nih thu a sawi a. Tuna DPRC chu kum 2001 a SIRD duan a nih atanga hmalakna zinga pakhat a nih thu leh he building hi a bikin Village Council te tana duan a nih thu a sawi a. Building tam tak hi a nihna turah hman a nih loh thin thu tarlangin, chu chu sawrkar mai ni lovin mipuite sum awmze nei lova luanral tirna a nih thu a sawi a. He building hi VC te tan a bika Training Center a nihna angin VC te pawh training a awm apiangin intuai-tharna angah ngaiin kal zel turin a chah bawk.

He hunah hian Bialtu MLA Jeje Lalpek-hlua pawhin building thar hawn chu hman tangkai thiam a tul thu sawiin, chumi tur chuan VC leh khaw-tlang hruaitute ah a innghat nasa hle tih a sawi a, thawhhona tha nen Hnahthial hmasawn nan tan lakpui theuh turin he huna tel te chu a sawm bawk.

Nimin-a hawn tak Hnahthial-a District Panchayat Resource Centre (DPRC)-ah hian Building pahnih awmin DPRC Office Building sakna atana Estimate amount chu cheng nuai 100 a ni a, Zothan Consultancy Services, Luangmual, Aizawl ten a sak hna hi thawkin Conference Room pakhat leh Office Room 4 awmin Toilet 6 dah a ni a. DPRC Hostel Building pawh cheng nuai 100 bawk Estimate-a sak niin Zothan Consultancy Services, Luangmual, Aizawl bawkin a sak hna an thawk a, Hostel Building-ah hian Room paruk (6) leh Choka pakhat (1) awmin Room tinah hian khum pahnih (2) zel dah a nih bakah Toilet dah vek a ni bawk.