GAD Principal Secretary leh Vigilance Secretary rawn kal

Mizoram sawrkar-a General Administration (GAD) leh Environment, Forests & Climate Change (EF&CC) Department changtu Principal Secretary Sudhir Kumar leh Vigilance Department-a Secretary Dr. YLN Reddy te chuan Inrinni khan Serchhip rawn tlawhin sawrkar Department hrang hrangte hmalakna thlirletna hun an neihpui.
Heng sawrkar mi pawimawh te hi District Bawrhsap Paul L. Khuma leh District Administration hotuten Bawrhsap Bangla-ah lo dawngsawngin Serchhip District-a sawrkar hmalakna hrang hrangte an thlirho a, Serchhip District chanchin tlangpui leh sawrkar scheme an kalpui dan te report niin DRDO Project Director Dr. Malsawmtluanga Fanchun chuan Mahatma Gandhi National Rural Employment Guarantee Scheme hnuaia hma an lakna tlangpui a sawi a. Election Officer Vanlalchhanhimi chuan Special Intensive Revision (SIR) an kalpui dan a tarlan bakah SDC leh Master Trainer ni bawk Dr Marilyn Lalruatkimi chuan Adi Karmayogi Abhiyan hnuaia Serchhip khaw chhunga leh thingtlang khaw hrang hranga training an neih dan te a sawi bawk.

Hemi zawh hian GAD Principal Secretary Sudhir Kumar leh Vigilance Secretary Dr. YLN Reddy te hian Serchhipa Circuit House sak mek a hmunah an tlawh a. Compensatory Afforestation Management & Planning Authority (CAMPA) Fund atanga hnathawh Entlang Social Forestry an tlawh bawk a. Hemi hnu hian Serchhip chhuahsanin Lunglei an pan leh a ni.