Awlsam zawka RAP leh PAP hmuh theih nan hma la mek

Chief Minister Lalduhoma’n Ministry of Home Affairs-in ramdang atanga lo zin, foreign tourist te tan bika permit a pek, Restricted Area Permit leh Protected Area Permit chu khualzin ten awlsam zawka an hmuh zung zung theih nan hma an la mek tih a sawi.

Mizoram Travel Fest 2025 ni 2-na nimin-a Aijal Club-a neih a hmanpuina ah Chief Minister Lalduhoma chuan ramdang nena inrina, International Border hmuh ve hrim hrim chak mi tam tak an awm thu sawiin, Ministry of Home Affairs-in ramdang atanga lo zin te tan bika permit a pek, Restricted Area Permit leh Protected Area Permit chu khualzin ten awlsam zawka an hmuh zung zung theih nan hma an la mek tih a sawi a. Inner Line Permit (ILP) pawh changtlung lehzuala kalpui tum niin, tunah hian online kaltlanga tih theih turin an buaipui mek a, hemi hmang hian tutenge an ILP tawp tawh hnua Mizorama la awm tih te chu awlsam takin an hre zung zung thei tawh dawn tih a sawi bawk.

Chief Minister chuan Mizoram-ah Tourism Industry hi nasa takin a thang chho mek tih pawh sawiin, “Kum hmasa Statistics atanga kan hmuh danin khualzin hi 139.50% laiin an pung a ni. Mi nuai 5.2 chuan an rawn zin a, kan ram mipui zatve deuhthaw a ni. Rel lo lut hian nasa lehzualin a ti pung ngeiin a rinawm,” tiin mikhual nei thiam, hnamdangte khawsakpui thiam kan nih a ngai tih a sawi bawk.