CEO in By-election neih tur NGO te a sawipui

Chief Electoral Officer (CEO) Mizoram Dr. Lalrozama chuan nimin khan a Pisa-ah NGO te kawmin Dampa Bial-a Assembly by-election neih tur chungchang a sawipui a. He inthlanna neih tur hi Mizoram pum huap inthlanna ni lova Constituency pakhata by-election neih tur a nih avangin Model Code of Conduct (MCC)-in a huam chinah fimkhur a ngaih thu a sawi a. Mizoram-a inthlanna zalen leh dik kan nei thin chu NGO-te hmalakna leh sawrkar nen thawhhona tha an neih vang a ni tih sawiin, Election Commission of India pawhin hemi kawnga Mizorama NGO-te thawhrimna chu an hriatpuiin lawmawm an tih thu a tarlang a ni.

Dampa Bial-a Assembly by-election neih turah hian Polling Station 41 awmin Critical Polling Station pathum a awm dawn a, Motor luh lohna Polling Station pakhat (2/11- Zopui P/S) awmin Polling Station 6 te chu hmun hla zual, Vote thlak hma ni 2-a Duty turte chhuah ngai a ni bawk.