Ruihhlo rawn lut zingah man erawh a tlem tih sawi

Mizoram Police-a IGP H. Ramthlengliana chuan Asia chhimchhak atanga Myanmar kaltlanga ruihhlo lo lut za zela 10 vel chauh man a nih thu a sawi.

Mizoram sawrkarin Vawiin, September 1, 2025 atanga ruihhlo do beihpui a thlak tur atana Myanmar ramri a ruihhlo tawlhna enfiaha Thawhtanni kaltaa kalte chu Aizawl-ah an lokir leh tawh a. Champhai District-a Myanmar ramri a awm khaw hrang hrang han tlawhtu Police hotute leh Central YMA hruaitute leh Champhai Sub-Hqrs. YMA hruaitute nena an inkawmkhawmna-ah IGP H. Ramthlengliana chuan ruihhlo chu nasa zawka do a tul thu a sawi a. Champhai chu ruihhlo tawlhna luhka lian ber a nih thu sawiin, nikum chhunga ruihhlo thubuai an ziahluh 370 zinga 170 chu Champhai Police ziahluh a nih thu leh kumin January atanga August ni 10 thlenga thubuai 150 chuang ziahluh zing za zela 50 aia tam chu Champhai District-a ziahluh a nih thu a sawi a. Champhai mipui leh khawtlang hruaitute chu theihtawp chhuahpui turin a sawm a ni.

Mizoram-a ruihhlo lo lut hian Khawvel hmun hrang hrang a dengchhuak tawh tih pawh IGP chuan sawiin, ramri-a venhim hna thawktu Assam Rifles-te chu ramri-ah tak taka an duty loh avangin duh duha inkalpawh theih a ni a, hei hian ruihhlo venna kawngah harsatna a siam thu a sawi a. Ruihhlo lo lut tur venna kawnga khawtlang hruaitute thawhpuia, an tha tichak turin Police 32 tirhchhuah an nih tur thu a sawi bawk. 

Central YMA Asst. Secretary Fabian Lalfakawma pawhin ruihhlo avangin Mizoram chu a la chhe vek lo a, ruihhlo a inhnamhnawih lo thalai tam tak la awm mah se, Mizoram hian chhiat lam a pan zel tih erawh hriat a tul thu a sawi bawk a ni. 

He hunah hian tlawmngai pawl hrang hrang aiawhte'n thu an sawi bakah Myanmar atanga ruihhlo rawn lut venna beihpuithlakna - Special Operation hi September thla atanga December ni 31 thleng kalpui tura ruahmanna siam a ni a, IGP H. Ramthlengliana ho hian Champhai District chhunga ramri hnaih khuate tlawhchhuah niin ruihhlo lo lut tur venna kawnga hmalak dan tur khawtlang hruaitute nen an sawiho thin a ni.