Bawngkawn-a silai hmehpuah ah mi pakhat a hliam

Zirtawpni zan dar 9:40 bawr vel khan Aizawl Bawngkawn-a lirthei a tlan mi pahnih insul pel tur intihbuaina thlengah silai hmehpuah a nih avangin mi pakhat a hliam a, a kaptu Rochhingpuia nia insawi chu man nghal a ni.

Bawngkawn Police Station-a thawktute sawi danin Zirtawpni zan-a Bawngkawn hmun lun laia intihbuaina thlengah hian Rochhingpuia (44) Haitinsanga fapa, Bawng-kawn Shalom Veng nia insawi chuan a pistol .32 Calibre Victor USA siam hmangin Lalhriatrenga Siakeng (21) Lalrawngbawla fapa, Zotlang chu a âwmah a kap a, Lalhriatrenga hi Greenwood Hospital-ah hruai nghal a ni a, a dinhmun a zia-awm chho zel tih Doctor te chuan an sawi. Thu-dawn danin Lalhriatrenga hi a awm bawrah a paivat deuhin kah a ni a, a nakah a tlang a, silai mu hian a pumpui hmun hnihah a kap tlang a, a ril a pawp a, a thin leh rilpuite a khawih lo thung a ni.

Thudawn danin Lalhriatrenga leh Ro-chhingpuia te hi an insual a, Rochhingpuia hian a motor-a pistol lain a kap niin mit a hmutute chuan an sawi a. Silai hmet puaktu Rochhingpuia lakah hian Bawngkawn Police Station ah tualthah tumna thubuai (attempt to murder case) ziahluh a ni a, a Silai license pawh man nghal a ni bawk.

Bawngkawn West Local Council chuan he thil thleng chungchang ah hian thuchhuah siamin pawi an tih thu an sawi a. Bawngkawn West mipuite an lo him tlan zawk nan Rochhingpuia te chhungkua hi an LC huamchhungah an awm zui zel an remti lo tih sawiin, August 30, 2025 ralhma ngeia chhuak turin an ti a, an chhungkua hian an huamchhung ah chenna In an neih an remti lo tih an sawi bawk.

Zotlang Branch YMA leh Local Council te pawhin an veng mi Lalrawngbawla chunga pawikhawihna an dem thu sawiin, pawi khawihtu hian a phu tawk hremna hmu ngei se an duh thu an sawi a. Hemi kawngah hian Lalrawngbawla Siakeng te chhungkua an thlawp dawn thu an sawi bawk.