Minister hovin HIV/AIDS dona tur sawiho a ni

Health & Family Welfare Minister Lalrinpuii leh National AIDS Control Organization (NACO), Ministry of Health & Family Welfare te chuan Zirtawpni khan Mizoram-a HIV/AIDS darh zel tur venna leh a vei mekte enkawlna chungchang an sawiho.

He sawihona hunah hian Minister Lalrinpuii leh NACO hotute chuan Mizorama HIV dinhmun te sawiin, HIV kai thar kumtinin an hniam ve zel thu an sawi a, Mizoram chu ruihhlo tamna State a nih avangin ruihhlo ti mekte’n HIV an kai lohna tura nasa taka tanlak a ngaih thu te leh hmalak zel dan tur te an sawiho a. Naupang, ruihhlo ti lo te’n ruihhlo an tih loh nan zirna In-ah te nasa lehzuala hmalak a nih theih nan Education Department nena hmalak a tul thu te an sawi a ni. 

Mizoram-a ruihhlo leh HIV darh zel loh nan leh a vei mekte’n enkawlna tha tak an dawn theih nan Kristian State kan nihna angin Kohhran te nena chak lehzuala hmalak a ngaih thu te an sawiho bawk a. Heng bakah hian HIV hrik pai mahni dinhmun la inhre lo ten an dinhmun an hriat vat a, ART damdawi an ei that chuan HIV kaihhnawih natna tam tak an pumpelh bakah HIV vanga thihna awm thei te ven a nih theih nan zau zawka HIV test neih dan tur te, mipuite hnenah uar zawka HIV test pawimawhna zirtir tura hmalak dan tur te sawiho a ni bawk.