PM in hmalakna 2 hawngin lungphum 6 a phum

Mizoram-a rawn zin Prime Minister Narendra Modi chuan Mizoram-a School pahnih hawngin hmasawnna hna thawh tur paruk (6) atan lungphum a phum bawk.

Prime Minister Narendra Modi hian Inrinni khan cheng vbc. 33 senga Ministry of Minority Affairs hnuaia sak Residential School, Kawrthah leh Ministry of Tribal Affairs hnuaia cheng vbc. 24 senga sak Tlangnuam Eklavya Model Residential School te chu a hawng a. Hemi rual hian hmasawnna hna thawhna tur lungphum paruk phumin heng te hi cheng vbc. 500 senna tur Ministry of Development of North Eastern Region (DoNER) hnuaia Aizawl Western Side Bypass Road te; cheng vbc. 226 senga Ministry of Petroleum and Natural Gas hnuaia thawh tur Mualkhang a 30 Tounsand Metric Tons Per Annum Gas Bottling Plant te; cheng vbc. 70 senga Ministry of Road Transport and Highways (MoRTH) hnuaia thawh tur Chhimtuipui (Tuipui Ferry) Lei (Bridge) te; cheng vbc. 45 senga Ministry of Development of North Eastern Region (DoNER) hnuaia thawh tur Thenzawl - Sialsuk kawngpui (via Sathlur & Lau river) leh cheng vbc. 32 senga DoNER hnuaia laih tur Khankawn to Rongura Hmun kawngpui, Serchhip District bakah cheng vbc. 12 senga thawh tur Khelo Multipurpose Hall, Tuikual, Aizawl (Ministry of Youth Affairs & Sports) te an ni.

Prime Minister chuan Mizoram in infiamna kawngah ram tana mi tangkai tak tak a neih thu sawiin, Football hmanga an hmingthanna chu ram tan a hlu hle tih a sawi a. Mizoram in Sports Policy mumal tak a nei thei chu lawmawm a tih thu pawh sawiin, Khelo India Scheme hnuaiah infiammi tha tak tak an awm chhoh mek thu leh thalaite tan kawng tam tak hawnsak an tum thu a sawi a, National Sports Policy-Khel India Khel Niti hnuaiah Mizoram thalaite tan kawng thar a inhawng dawn tih pawh sawiin, infiamna leh kutkawih eizawnna kawng hrang hrangah thalaiten hmabak eng tak an nei tih a sawi bawk.