Kum li chhungin ILP nei lo mi 2,620 thawnkir an ni

Kum 2022 atanga kumin 2025 chhungin Inner Line Permit (ILP) nei lova Mizoram-a lut mi 2,620 thawnkir an ni a, hemi hun chhung vek hian ILP pekchhuah 35,922 a awm bawk.

Home Department chhinchhiah danin kum 2022-ah ILP nei lova Mizoram-a rawn lut thawnkir mi 377 an awm a, kum 2023-ah mi 483 awmin kum 2024-ah mi 1,463 leh kumin chhungin mi 297 thawnkir an ni tawh bawk a ni. Kum 2022 chhung khan Mizoram-ah ILP pekchhuah mi 12,471 an awm a, kum 2023 chhungin mi 8,200 pekchhuah niin kum 2024 chhungin 9,759 leh kumin 2025 chhungin 5,492 pekchhuah a awm leh tawh bawk a ni.

Hetihlai hian Mizoram sawrkar-a Home Minister K. Sapdanga chuan August 30, 2025 khan Kolasib District-a Mizoram leh Assam inrina bul vel tlawhin, Mizoram-ah Rel a rawn luh dawn avangin ILP pekah fimkhur zawka hmalak a tul thu a sawi a. Bairabi khawtlang hruaitute chuan ILP Check Gate hela Tlawng dunga Mizo-ram lut thinte dan nan ILP Check Gate a awm a tul thu an lo thlen a. Home Minister pawhin Mizoram-ah Rel a luh dawn bawk avangin ILP pekchhuah kawngah fimkhur zawka hmalak a tul thu a sawi a ni.

Home Minister K. Sapdanga chuan Bairabi-Sairang Rel kawng thar chu hmasawnna ropui tak a nih thu a sawi a, “He hmasawnna hian State dang atangin mikhual tam zawk an luhna kawng a hawng zau dawn a, chu bakah, a let zawnga ruihhlo lo luhna kawng pakhat a ni thei a. Dan hnuaiah Mizoram-a lutte felfai taka chhinchhiaha an luh theih nan ILP pek kawngah fimkhur zawka hmalak a tul dawn a ni,” a ti a. Hei bakah hian tunhnaiah Assam State atangin Mizoram lama document fel fai neilo a rawn luh tum an awm thin thu pawh a sawi bawk a ni.