Bairabi leh Sairang inkara Rel kawng hawn a nih hnuah Cargo Service Train service tir nghal dawn

Union Railways Minister Ashwini Vaishnaw chuan Bairabi leh Sairang inkara Rel kawng hawn a nih hnuah Cargo Service Train an service tir nghal tur thu sawiin, Chief Minister Lalduhoma chuan Rel kawng thar leh rel service tharte hian India ram laili nen inpawhna thuk zawk min siam sak dawn thu a sawi bawk.

Bairabi leh Sairang inkara Rel kawng siam thar hawnna puala inkhawm Inrinni-a neih ah Union Railways Minister Ashwini Vaishnaw chuan Mizoram mipuite a lawmpui thu sawiin, “He project hi a awlsam lo hle a, leiverh 45 leh Lei lian 55 zet a awm a. Lei ban sang ber phei chu Delhi-a Qutub Minar ai pawhin a sang zawk a ni,” a ti a. Rel hmanga Mizoram khawpui kawlpawh theih a ni ta chu hun chhinchhiah tlak leh lawmawm a nih thu sawiin, khualzin tan awlsamna tam tak a thlen dawn thu leh ram mite tan hna a siam ang a, thilman a tlawm phah bakah Tourism-ah hmasawnna a thlen dawn tih a sawi bawk.

Hei bakah hian Union Railway Minister chuan bungraw phur chi Rel, Cargo Service Train pawh an Service tir nghal dawn thu sawiin, Refrigerated Coach pawh a awm dawn thu a sawi a, “Kan thlai tharte awlsam takin State pawnah kan phur chhuak zung zung thei tawh dawn a ni. Hei hian Prime Minister Pu Narendra Modi kaihhruaiin hmarchhak Bial tana a hmathlir (Act East) a tihhlawhtlinna a ni,” tiin Hmarchhak-a Railways service lama hmalakna dangte pawh a tarlang a. Kum 2014 hma chuan Railway atan hmarchhak tan budget vbc 2000 chiah dah a nih thu leh hei hi Prime Minister Narendra Modi chuan tipungin, hmarchhak tan vbc 77,000 a dah thu a sawi a, “Mizoram tan pawh chhenfakawm hle a ni,” a ti bawk.

He hunah hian Chief Minister Lalduhoma pawhin Bairabi atanga Sairang Rel kawng hawn a ni ta chu Mizoram tan ni chhinchhiah tlak tak a nih thu leh Mizoram in Rel kawng an nei tur chu ramchhung inpawhtlanna atana Prime Minister hmathlir tih hlawhtlinna pawimawh tak a nih thu a sawi a. “Rel kawng thar leh Rel service tharte hian India ram laili nen inpawhna thuk zawk min siamsak dawn a, sum leh pai-ah hma kan sawn pui hle ang. India ramah huapzo takin hmasawnna hna kalpui a nihzia a tilang bawk,” a ti a. “Mizoram hmasawnna tur thil kan sawi apiang hi Prime Minister hian inhawng takin min ngaihthlak sak thin a, a chungah hian kan lawm thin hle,” tiin he Rel kawng a puitlin theihna tura theihtawp chhuahpui thintu Railways Minister Ashwini Vaishnaw chungah pawh lawmthu a sawi a. “Tlangram-a Rel kawng, leiverh leh leihlawn tam tak awmna sial hi thil awlsam a ni lova, hnathawh ropui bik a tling a ni. He hna ropui tak thawktu Railway Board, Engineer leh Workers te an chhuanawm hle. Chutihrualin, August 2023-a he Rel kawng siam laia vanduaina tawka nunna chan ta kan thiante kha kan hrereng a, a pawi kan la tibang thei lova, an chhungte kan tawrhpui takzet a ni,” a ti bawk.