NGHAM in Cashless Systam an dodal lo tih sawi

Non-Government Hospital Association of Mizoram (NGHAM) hruaitute chuan MUHCS hnuaia Cashless System chu an dodal ngai lo tih an sawi.

Mizoram Legislative Assembly Session neih zawh takah khan Health Minister Lalrinpuii chuan Private damdawi In ten MUHCS an zawm loh chhan chu Cashless an duh loh vang a nih thu sawiin, hei hi thu diklo a nih thu NGHAM hruaitute chuan an sawi thung a. NGHAM Secretary Hmingtea Chhangte chuan MUHCS hnuaia Cashless System an dodal ngai lo tih sawiin, sawrkar hmasa hunlai khan cheng vbc. 4 chuang an lo hloh tawh avangin Private damdawi In te chuan Financial Security rintlak tak an duh thung tih a sawi a, NGHAM in MUHCS chungchanga an duhdan State sawrkar hnena an thlen hnuhnun ber tum, June ni 30 khan Private damdawi In ten Cashless System an hmang dawn a nih chuan damlo te chuan MUHCS Package rate-in a huam theih bak te chu an pek a ngai dawn tih an sawi a, sawrkarin he rawtna hi a remti lo a nih chuan NGHAM Member damdawi In te rate an hman lai theuh chu hman phalsak turin an ngen a, hetihlai hian state sawrkar chuan tun thlengin NGHAM rawtna te chu an la chhang lo niin a sawi.

Hei bakah hian NGHAM Member Hospital te tana Financial Security dah chu Hospital pakhat chauh pawhin hman tur a nei tawh lo a nih chuan automatic-in NGHAM member Hospital te chu Reimbursement System-ah an lut lailawk anga, ni 30 chhunga Financial Security dahkhah leh a nih chuan Cashless in an kal chhunzawm anga, hetihlai hian huntiam chhunga Financial Security chu dahkhah leh a nih loh chuan NGHAM member Hospital te chu Reimbursement System-ah an awm hlen tawh turin sawrkar hnenah rawtna an thlen tih a sawi bawk.