Lungsen-a Oil Palm chinna a hmunah enfiah

Sawrkar laipui Ministry of Development of North Eastern Region (DoNER)-a Joint Secretary (NEC) Angshuman Dey chuan Inrinni khan Lunglei District chhung Lungsen khuaa Oil Palm chinna hmun (plantation) tlawhin, Oil Palm chingtute harsatna leh mamawh hrang hrang a enpui.

DoNER Joint Secretary (NEC) Angshuman Dey hian Oil Palm chingtute dinhmun leh mamawh hrang hrang enpuiin, Department hotute nen hlawk zawka Oil Palm tharchhuah a nih theih nana thil pawimawh hrang hrang leh hmalak dan turte an sawiho a. Oil Palm hralhchhuahna kawnga harsatna lian ber pakhat, a phurhna kawng (link road) mamawhna te a hmunah hmuhpuiin, an harsatna sutkianna tur project ngaihtuah a nih tur thu a sawi a ni.

Kuthnathawktute nena inkawmhona ah Angshuman Dey chuan Lunglei District chu Oil Palm chhinna tur ram nei tha District a nih angin awmze nei zawk leh tihtak zeta Oil Palm chin chu kalpui turin kuthna-thawktute a chah a. An mamawh hrang hrangah inthlahrung lova Department-a thawktute rawn thin tura chahin, kuthnathawktute'n an harsatna leh mamawh hrang hrang a hnena an lo thlente chu a theih anga um zui a nih tur thu a sawi bawk. DoNER Joint Secretary (NEC) hi Agriculture & Farmers Welfare Department Secretary Ramdinliani leh Department a hotu pawimawh ten an tawiawm a ni.