Mizo damlai zinga upa ber ah Pi Buangi puan a ni

Aizawl Khatla a cheng Lalneihsangi, Pi Buangi tia hriat lar chu Mizo damlai zinga upa berah puan a ni a, Social Welfare Department in zirchianna an neihna atanga puan a ni.

Mizo damlai zinga upa ber hi Inrinni khan Pi Buangi puala Aijal Club-a hun hman ah Social Welfare Minister Lalrinpuii chuan puangin, zirchianna neih hnu a Mizo zinga upa ber nihna a chang thei chu a lawmpui thu Pi Buangi chu a hrilh a. Social Welfare Department chu Sawrkar Department-ah chuan kum upa te lam changtu Department a nih thu leh, Tar leh upate pension an pek thin mai bakah kumtin Upate Ni a hman thin thu te a sawi a. Upate tana Home te, Day Care Centre siam belh a nih theih nan sawrkar laipuiah thlen a nih tawh thu a sawi bawk.

Social Welfare Minister chuan khawvel changkang zelah Mizoram ah ngei pawh upa an lo tam belh zel thu a sawi a. Social Welfare Department in a chhut dan chuan kum upa te hi Mizo-ram-ah 70,000 chuang awmin, kum 2036-ah chuan nuai khat an tlin ve tawh rin a nih thu a sawi a. “Mizote chuan Aia upa zah hi kan hnam nunphung thurochhiah pawimawh tak, Mizote min ti Mizo lehzualtu a ni tih te pawh hre thar ila,” tiin he huna kalkhawmte chu a chah bawk.

Pi Buangi tia hriat lar tak Lalneihsangi hian April ni 14, 2025 (Thawhtanni) khan kum 108 a tling a, kum 109 a hmang mek a ni. Amah hi Aizawl Venghnuai a piang leh seilian niin an chhungkua hi Salvation Army zawm hmasate zinga mi an ni a, a pa chu Thangchhunga CSM niin Mizoram-a (Kohhran Upa) Corps Sergeant Major hmasa ber a ni. Pi Buangi hi Mizo zinga Rehab a thawk hmasa te zinga mi a ni bawk a, Behala Girls Home Kolkata-a hmeichhe rahbi tleu leh fahrah te enkawina hmunah a thawk tawh thin a. Kum 2022 khan Heritage Award buatsaih Mizo Hmeichhe Chhuanawm ‘Women of Substance’ hlan a lo ni tawh bawk a ni.