ILP pekchhuah kawngah fimkhur zawka hmalak tul a tih thu Home Minister in a sawi

Home Minister K. Sapdanga chuan Dan hnuaia Mizoram-a rawn lutte felfai taka chhin-chhiah-a an rawn luh theih nan ILP pekchhuah kawngah fimkhur zawka hmalak a tul thu a sawi.

Home Minister hian Inrinni khan Kolasib District leh Hailakandi District (Assam) inrina hmun, Bairabi Sub-Division tlawhin Inner Line Permit (ILP) Check Gate, Police Station leh Rel Station-te a hmunah a enfiah a. Hemi hnu hian Bairabi Civil Sub-Divisional Office-ah khawtlang hruaitute, Sawrkar Officials-te leh tlawmngai pawl hruaitute nen an inkawm zui bawk a. He hunah hian Home Minster chuan Mizoram-a Rel kawng thar September ni 13-a hawn tura ruahman chu hmasawnna ropui tak a nih rualin; he hmasawnna hian State dang atangin mikhual tam zawk rawn luhna kalkawng a hawn zauh sak dawn bakah a let zawnga ruihhlo lo luhna kawng pakhat a ni thei tih a sawi a. Chumi avang chuan dan hnuaiah Mizoram-a rawn lutte felfai taka chhinchhiah a an rawn luh theih nan ILP pekchhuah kawngah fimkhur zawka hmalak a tul thu sawiin, heng thil hrang hrangte hi a hmuna chengte nen sawihona neih sawrkar in tha atih avanga he hun hi an ruahman thu a sawi a ni.

He inkawmhona ah hian Bairabi khawtlang hruaitute chuan tuna Bairabi ILP Check Gate a hman mek chu COVID-19 hri len laia Screening Point-a hman thin a nih thu leh Temporary ILP Check Gate atana hman chhunzawm a nih dante an sawi a. ILP Check Gate hi Sawrkar hnuaia dan anga changtlung zawka din a nih thuai theih nan hmalak nise tih te, ILP Check Gate hel-a Tlawng dung atanga Mizoram rawn lut thin te dan nan Tlawng dunga ILP check Gate awm a tul zia leh Bairabi leh a chhehvel a hnamdang in awmhmun an lo khuar thin te dapchhuah kawngah sawrkarin chak takin hma la se an duh thu Home Minister hnenah hian an thlen a. Heng bakah hian State dang atanga dan lova lo lutte leh dan phal loh bungrua lo lut te chak zawka dapchhuah leh ven dan kawng te sawiho a ni bawk.

He hunah hian Home Secretary Vanlalmawia chuan Mizoram-a Rel lo lut tura avanga Sawrkar inbuatsaihna hrang hrang te sawiin, Rel Station panga (5) zinga pali (4) chu Kolasib District chhunga mi a ni tih a sawi a, Railway Police din chungchanga sawrkar ruahmanna hrang hrang te, ILP Counter kalpui a pawimawh dan leh ruahmanna te, hemi chungchangah Sensitization neih dan tur ruahmanna siam a nih thu te a sawi lang bawk.

Home Minister hian Bairabi atangin Phaisen leh Vairengte lam panin ramri dinhmun a enfiah nghal a, Kolasib District chhunga Inner Line Permit (ILP) Check Gate awmte tlawhin Vairengte Joint YMA Committee Room-ah Central YMA hruaitute leh Vairengte khawtlang hruaitute nen an inkawmho bawk a. Deputy Speaker Lalfamkima, Adviser to CM TBC. Lalvenchhunga leh Lalmuanpuia Punte bakah sawrkar Official pawimawh ten an tawiawm a ni.