CAG Report pharh takah chhiatna thleng thei laka invenna lam buaipuitu duhkhawp lohna tarlan a ni

Mizoram Legislative Assembly Fur thutkhawm a Chief Minister Lalduhoma'n House dawhkana a dah Comptroller & Auditor General (CAG) Audit Report-ah chhiatna thleng thei laka invenna lam buaipuitu, State Disaster Management Authority leh a hnuaia Committee dangte hnathawh duhkhawp lohna nasa tak tarlan a ni.

Nikum March thla tawpa Cyclone Remal a tleh avang leh a hnu zela ruahsur nasa avanga Mizoram-a mi 42 lai an thih hnu, In pawh 5,938 lai a chhiat hnu kuminah pawh Fur ruahtui tla tam lutuk avanga mi 6 thi-a hmun 940 a leimin leh chhiatna dang dangin Mizoram pumah harsatna namen lo a siam laiin CAG Audit Report chuan State Disaster Management Authority (SDMA), State Advisory Committee (SAC) leh State Executive Committee (SEC) te chuan Disaster Management Act-in tihtur a tih angin thil an ti nep niin a sawi a. CAG report chuan State Authority hian hmasawnna hnathawh dawnin chhiatna thleng thei venna leh a lo thlen a chhiatna tihnep dan tur ruahmanna te a en letsak ngai lo niin a tarlang. 

Hei bakah hian SEC hian hmasawnna hna thawh dawna a him leh him loh tur National Building Code 2005 duhdan angin a duang ngai lova, State Disaster Management Plan leh National Disaster Management Plan duhdan angin leimin duhna hmunte hunbi nei a endik a ni ngai hek lo a. Aizawl Hunthar Veng-a lei tawlhna hmuna leilungte chu endik a ni na in hmundang erawh hlamchhiah a nih thu CAG report hian a tarlang bawk.

SDMA hian lirnghing, leimin, tuilian, thlichhe tleh leh ruah bawhawk sur a lo thlena chet lak dan tur Standard Operating Procedure (SOP) hrang siam lovin Mizoram-ah leimin a tam em em chungin a vilna atan 'Automated Landslide Monitoring System' a la ruahman lo a. Kum 2020-21 leh 2021-22 chhung khan Medical leh Police lam mite pualin mock drill a buatsaih ngai lo tih te pawh an tarlang a. Chhiatna lo thleng bika che tur State Disaster Response Force Battalion din a la nih loh thu leh Police-te atangin training pek ni mah se Police zingah hmeichhiate training pek an la ni lova, NDRF sum hmanna-ah felhlel leh lei phal loh thil leite a awm bawk niin CAG report chuan a tarlang bawk a ni.