FCAA 2023 pawm duhlohna lantir a ni dawn

Joint Civil Society of Mizoram (JCM) huaihawtin Mizoram Legislative Assembly in Forest Conservation Amendment Act, 2023 (FCAA, 2023) chungchanga resolution a pawm duhlohna lantir a ni dawn.

    August 27, 2025-a Mizoram Legislative Assembly-in Forest Conservation Amendment Act, 2023 (FCAA, 2023) a nihna ang anga Mizoram-a hman theih tura an pawm chu tha an tih loh thu leh pawmpui theih ni lova an hriat avangin Inrinni khan JCM huaihawtin Aizawl-ah inrawnkhawmna neih a ni a, he hunah hian NGO, Political Party leh Pawl hrang hrang an sawm zingah Central YMA, MHIP, MPCC, MNF, PC, Mizoram Transformation Movement (MTM), CESJ, Mizoram First, CATAJ, ZORO, Mizoram Environment NGO te an tel a, Mizoram Assembly-in FCAA 2023 a lo pawm tak chu ram leh hnam, thlahte leh chhuan lokal zel turte tana thil him lo, tha lo leh pawi tak, chhiat hlenna hial thlen thei ni a an hriat thu an sawi a. “FCAA 2023 hi a nih ang anga pawm hi tha an tih loh thu leh Mizoram Legislative Assembly Session August ni 27-a thukhawm in a lo pawm chu sut leh ni sela, a tul angin Assembly Special Session pawh ko ngei rawh se,” an ti. Hemi kawnga hmalakna tur hrang hrang duan nghal niin mipui punkhawm, Kawngzawh leh a tul angin Bandh emaw huaihawt nise an ti a. A tul anga Mizo mipuite hrilhfiaha Mizoram khaw hrang hranga vantlang inkhawm huaihawt bakah Signature Campaign neih te pawh an rel bawk a ni.