Kumin ah Malaria vanga thi mi 6 an awm tawh
Health & Family Welfare Department-a National Vector Borne Diseases Control Prog-ramme (NVBDCP) hotute sawi danin kumin chhung hian Mizoram-ah Sikserh (Malaria) vei mi 6,119 hmuhchhuah a ni tawh a, an zingah hian mi 6 te chuan thihpuiin heng Malaria avanga thi zinga mi 5 te chu Malaria PF vei an ni a, Malaria PV vei mi pakhat a thi bawk. Mizoram-a Sikserh vei tam berna te chu ramri hnaih lam a ni a, a bikin Lawng-tlai, Lunglei leh Mamit District-ah te Sikserh hri kai an tam zual a. Sikserh natna avang hian kum nga (5) kalta chhung (kum 2020 atang) khan mi 46-in an thihphah tawh a. Nikum chhung pawh khan Sikserh vei mi 16,899 hmuhchhuah zinga 7 an thi a ni.
Hetihlai hian kumin hian Mizoram-ah Dengue natna thihpui erawh an la awm lo chungin a hri kai erawh mi 783 zet hmuhchhuah a ni tawh a. Kum 2012-a Mizoram-a Dengue hri kai mi 6 hmuhchhuah a nih atang khan nikum thlengin he hri avang hian mi 8 an thi tawh a. Thi an tam ber kum chu kum 2022 kha a ni a, hemi kum hian mi 1,868-in Dengue hri kaiin mi 5 in an thihpui a. A kum leh, kum 2023 khan mi 2 thiin nikum khan mi pakhat a thi leh a. Dengue vanga thite hi Aizawl District ami vek an ni.