CAG Report in H&FW Department enkawl thu ah Mizoram sawrkar na takin a sawisel
Comptroller and Auditor General of India (CAG) report hnuhnung ber chuan Health & Family Welfare Department enkawl chungchangah Mizoram sawrkar chu na taka sawiselin, hriselna lam atana pawisa dah tlem lutuk, hnathawk indaihlohna nasa leh COVID-19 hri len lai a mipui hriselna lam ngaihthah ah a puh.
Comptroller and Auditor General of India (CAG) report-in a tarlan danin chuan National Health Policy, 2017 chuan kum 2020 atang chuan hriselna lama sum sen tur ruahman hi budget pum atanga za zela 8 aia tama tihpun chhoh tur a ni a. Amaherawh chu kum 2017-2022 inkara Mizoram a hriselna lam atana budget ruahman chu za zela 8 aia hniam niin za zela 4.8 leh 6.60 inkar chauh a ni. Kum 2021-22 ah budget pumpui atanga za zela 3.95 chauh hriselna lam atana hman tura sum ruahman a ni a, kum 2017-18 ah za zela 4.94 chauh ruahman a ni bawk.
District Hospital zingah Aizawl-a District Hospital-te tih loh chu mipui mamawh ang tur nei kim an awm lova, a bikin Saitual, Hnahthial leh Khawzawl District Hospital te chu a nih tur anga thuam an la ni lo hrim hrim a, District Hospital-ah te hian Specialist Doctor indaihlohna chu za zela 39 leh 45 inkar a ni a, General Duty Doctor indaihlohna phei chu za zela 72 leh 75 inkar a ni a. Nurse indaihlohna chu za zela 43 leh 46 inkar niin Paramedic indaihlohna pawh za zela 45 leh 50 inkar a ni.
Kum 2021-22 khan naupang pneumonia vei enkawlna chu Saitual District Hospital tih lohah chuan a awm vek a, Intensive Care Unit (ICU) erawh chu Aizawl District Hospital leh Cham-phai District Hospital-ah te chauh a awm niin tarlan a ni bawk.
Heng bakah hian COVID-19 hri len lai khan hriselna lama hmasawnna ruangam din te chu tangkai taka hman a awm meuh lova. COVID-19 hri kai leh kai loh endikna RT-PCR khawl bun a khawtlai a, Oxygen siamchhuahna khawl bun pawh tih khawtlai a ni a. Kum 2021 April thla chawhnu lama bunfel tura tih Oxygen siamchhuahna khawl 7 zinga pahnih chauh kum 2023 April thla khan bun a la nih thu Auditor-te chuan an hmuchhuak a. Thla 11 leh thla 25 inkar chhung zet tihkhawtlai a ni tihna a ni.