CM in NECCOD Fresher Social a hmanpui

Chief Minister Lalduhoma chuan nimin khan New Delhi-a St. Xaviers Sr. Secondary Millenium Hall-ah Northeast Catholic Community of Delhi (NECCOD) Fresher Social vawi 33-na chu khuallian niin a hmanpui.

Nimin-a he hun hman ah hian Chief Minister chuan Catholic Kohhran chu India rama zirna, hriselna leh mi chhumchhiate chhawmdawlna lama langsar taka rawngbawl thin an ni tih sawiin, Mizoram-ah pawh rawng-bawlna ropui tak tak an kalpui nasa hle tih a sawi a. Zoram Entu Pawl chu tanpui ngaite tanpuitu kan neih langsar an nih thu leh Aizawl-a sawrkar High School ni lo High School hmasa ber St. Pauls High School dintu niin kum 1953-ah an din thu a sawi a, Vawiin thlenga Mizoram-a High School tha bera ngaih ni thei khawpin an kalpui tih a sawi a. Zirna In tha tak tak dang pawh tam tak an nei tih a sawi a. He Kohhran mi leh sa, ram hruaitu langsar tak tak, Mizoram Chief Minister hmasa ber Ch. Chhunga te, Assam Public Service Commission Chairman R. Thanhlira te, Assam sawrkara Mizo Minister hmasa A. Thanglura te, FC Nghina te, J. Lalsangzuala te leh midang tam tak an lo nei tawh thin tih sawiin, St. Anthony College, Shillong te chu NE India-a College lar hmasa a ni tih a sawi bawk.

Chief Minister chuan Catholic Kohhran mi leh sa, Delhi-a khawsate huikhawmtu tha tak NECCOD an nei chu tha a tih thu sawiin, Kohhran leh ram tan chauh ni lovin hmarchhak mipuite inunau nan pawh NECCOD hian a thawhhlawk hle tih a sawi a, an rawngbawlna chu chhunzawm zel turin a chah bawk a ni.

Nimin-a Fresher Social an hmanna ah hian Chief Minister hi IPR&PS Minister Dr. Vanlalthlana leh Lok Sabha MP Richard Vanlalhmangaiha ten an tawiawm a ni.