MUHCS hnuaia hamthatna dawng thei tura inziaklut chhungkaw nuai 2.8 chuang awm

Mizoram Universal Health Care Scheme (MUHCS) hnuaia hamthatna dawng thei tura inziaklut chhungkaw 2,87,097 awm tawhin hetihlai hian Non-Government Hospital Association, Mizoram (NGHAM) hruaitute chuan MUHCS zawm leh zawm loh chungchangah an dinna ngai ah an la ding tih an sawi.

Kumin April ni 1 atanga Mizoram sawrkar in a hman tan, Mizoram Universal Health Care Scheme (MUHCS)-ah hian kumin June thla tawp thleng khan inziahluhna hun hawn niin hemi hnu, August, 2025-ah ruahman lawk angin khawngaihna hun (grace period) siamin inziahluhna hun hi hawn leh a ni a, hetah hian inziahluh man erawh tihsan niin hemi hun chhung hian chhungkaw 1,853 an inziahluh belh leh a. Heng te nen hian tun thlengin MUHCS-ah hian sawrkar hnathawk chhungkaw 36,324, Pensioners chhungkaw 10,163, AB-PBJAY chhungkaw 2,20,463 leh mipui chhungkaw 20,147 an inziaklut tawh nia thudawn a ni.

Hetihlai hian MUHCS-ah hian Mizoram-a Private Hospital tam zawkte chu tun thlengin an la tel lo a, NGHAM hruaitute chuan MUHCS zawm leh zawm loh chungchangah Mizorama Private Hospital tam zawkte chu an dinna ngaiah an la ding a, tun dinhmunah chuan zawm leh zawm loh chungchang ah thuthar an nei lo a, tunhnaia sawrkar a lehkha an thehluh an nghak mek bawk tih an sawi. NGHAM hruaitute chuan MUHCS chungchangah Mizoram sawrkar leh Private Hospital tam zawkte an la inthlunzawm loh avangin mipui an khawngaihthlak niin an sawi bawk a, sawrkar damdawi In chang lo, sum nei bawk si lo mi tam tak te chu an damdawi In awm man leh an enkawlna man chawi mang lo a an admit mek thu an sawi a, mipui an khawngaihthlak niin an sawi bawk a ni.

MUHCS hnuaiah hian AB PM-JAY, Mizoram State Health Care Scheme leh sawrkar MR-te chu chhunfin an ni a, heng te hi kalphung khat hnuaia kalpui a ni a. Hemi hnuaia hamthatna dawn theih dan erawh siam danglam a ni thung a. Civil Pensioner leh Provisional Employee-te pawh he sheme hnuaiah hian hamthatna siamsak an ni. Damlo ten sum chawi lova an inenkawl theihna, MUHCS hi sawrkar damdawi In te leh Empanelled Hospital-te-ah hman theih a ni a, sawrkara inziaklut lo damdawi In-ah erawh hman theih a ni lo thung a. MUHCS hnuaia Mizoram sawrkarin damdawi In a thawhpui (Empanelled Hospital) hi Mizoram-ah damdawi In 11 leh Day Care pathum, State pawnah 25 leh Deemed Empanelled Hospital 13 a awm a ni.