Raltlan mi 6370 te data lakkhawm hna thawh a ni tawh

Myanmar atanga Mizorama raltlanm rawn lut te Mit-naute leh kut ze thla lak hna chu a kal chak thei lo hle a, thla khat chuang chhungin raltlan 33,300 chuang zinga 6,370 chauh thla lak sak hman an ni.

Home Department hotute sawi danin Biometric Enrolment hi duh angin District hrang hrangah kalpui chak theih a ni lova, an harsatna tawh lian ber chu ‘Foreigners Identification Portal & Biometric Enrolment’ (FIP&BE) software hmanga hna an thawhna khawl hman chiangkuang lo leh internet signal tha tawk lo te a ni a. Hei hian an hna a tithuanawp nasa hle niin Official-te chuan an sawi a. Relief Camp-a awmte a hlawma endik an awlsam rualin an fate hmundanga lehkha zira awm an lo awm ve bawk avangin an Biometric data lak kim a harsa an tih bakah chhungte leh thiante belte bakah mi In luaha awm hmun karkir tak taka awmte chu khawtlang hruaitute tanpuina an hmu chungin hun a duh hle niin an sawi bawk. 

Ministry of Home Affairs duhdana Biometric Enrolment chauh kalpui tura ngaih a nih laiin Biographic data pawh lakkhawm nghal a ni a. Raltlan hming, nu leh pa, a lokalna khua, Myanmar a a awm lai leh Mizoram-a an thawh te lak a ni a. Tunhma lamah mimal chanchin chhinchhiah hna hi kalpui chhuah vek a ni mah se an dinhmun hi a danglam reng avangin mimal chanchin chhinchhiah hi thar thawh leh a nih thu Home Department hotute chuan an sawi a ni.

Myanmar raltlan bakah hian Bangladesh Chittagon Hill Tracts atanga raltlan hi mi 3,000 tling lo an awma ngaih a ni a, heng mite pawh hi an data lakkhawm leh tur a ni dawn a ni.