International Literacy Day

School Education Minister Dr. Vanlalthlana chuan Mizoram in ziak leh chhiara hma a sawn zel theih nan sawrkar mai bakah Kohhran, tlawmngai pawl hrang hrangte leh mipuite thawhhona a pawimawh tih a sawi.

    Vawiin September 8-a Khawvel ziak leh chhiar Ni, International Literacy Day puala thuchah a sawi ah Education Minister Dr. Vanlalthlana chuan he ni in a tum ber chu ziak leh chhiar thiam pawimawhzia leh a tulzia inhriatthar tir a ni, a ti a, Ziak leh chhiar thiam chu mihring dikna chanvo a nih thu sawiin, International Literacy Day chu kum 1976 atangin kum tin Mizoram-ah pawh hman thin a nih thu a sawi a ni. Minister chuan sawrkarin ziak leh chhiar thiam an lo pun zelna tura hma a laknaah a enkawltu sawrkar Department bakah Kohhranho leh an hnuaia Missionary te, Tlawmngai pawl hrang hrang leh mipuiten an thawhhlawk zia a sawi a. Zirtirtu leh zirlaite inpekna thukzia an hriat reng thu leh ropui a tih thu sawiin, Mizoram chu sawrkar laipui pawhin India ram puma ziak leh chhiar thiam kim hmasa bera a pawm tak thu a sawi bawk.