Bairabi leh Sairang inkar Rel kawng hawngin Rel Service tur pathum vailiam nghal a ni

Bairabi leh Sairang inkara Rel kawng siam thar chu Inrinni khan Prime Minister Narendra Modi chuan hawngin Mizoram-a Rel Service thar pathum- Aizawl to Delhi Rajdhani Express (Anand Vihar Terminal), Aizawl to Kolkata Express leh Aizawl to Guwahati Express te a vailiam nghal bawk.

Cheng vbc. 8071 senga siam Bairabi leh Sairang inkara Rel kawng thar hawnna hi Aizawl Lammual-a neih tura ruahman ni mah se khaw awmdan in a zir loh avanga Prime Minister hian Lengpui Airport bak a rawn thlen theih loh avangin Lengpui Airport atangin biakhmuh theihna kaltlangin Rel kawng hi a hawng a. Prime Minister chuan khaw chhia avangin Aizawl a thlen theih loh thu leh Lengpui atanga he Rel kawng thar a hawn mai a ngai ta chu pawi a tih thu a sawi a, hmasang atangin Mizoram mipuite chu mi dangte tana pen chhuaka nun hlan ngam an ni tih sawiin, Lalnu Ropuiliani leh Pasaltha Khuangchera te angin tlawmngaihna leh midang tana nun an hlan thin thu a sawi a. “Vawiin hi India hmasawnna kawngah Mizoram tan Mel lung pawimawh tak a ni a, Vawiin atang chuan Aizawl chu India Railway Map-ah a awm reng tawh dawn a ni,” a ti bawk.

Prime Minister chuan he Rel kawng lungphum phumtu a ni leh a hawngtu a ni thei chu lawmawm a tih thu sawiin, “He tRel kawng sial hi a hautak em em a, kan Engineer leh hnathawktute inpekna ropui tak avanga lo hlawhtling thei chauh a ni. Sairang to Delhi Rel kawng thar hi inkalpawhna a ni satliah lo, kawng tinrenga hmasawnna thar lo thleng tur atana a kulpui a ni. Sumdawng te, loneitu te, zirlaiten an chhawr hle dawn a, hriselna lamah pawh kan tangkaipui hle ang. Sector hrang hrang kawngpui, energy, sports leh a dangte pawhin hma a sawnpui dawn a ni,” a ti.

An sawrkar hnuah hmarchhak Bial tan hmasawnna hna an thawh hnem tawh thu leh an la thawh zel dawn thu Prime Minister chuan sawiin, “NE India leh SE Asia hi Mizoram kaltlanga thlunzawm kan tum a, Act East Policy hnuaia Kaladan Multi Modal Transit Transport Project leh Sairang to Hmawngbuchhuah Rel kawng hmangin NE Economic Corridor, Bay of Bengal kaltlangin Asia chhimchhak ram te kan thlunzawm dawn a ni. Hmarchhak Bial-ah hian Thingtlang kawng te, National Highway te, Mobile Connection, Electricity, Tap Water Connection, LPG Connection leh hmasawnna dang pawh kan thawk nasa hle a. RCS - UDAN Scheme hnuaiah Mizoram-ah Helicopter Service thar kan dah belh dawn bawk. Tun hmaa ngaihsak hlawh ngai lote khan Vawiin-ah chuan hmun laili an chang ta a ni,” a ti bawk.

Prime Minister in a hawn tak Kilometer 51.38-a thui Bairabi to Sairang Rel kawng siam nan hian a tirah cheng vbc. 2393.49 ruahman niin a hnuaah ennawn chhoh niin cheng vbc. 8071 senga zawhfel a ni a. Bairabi to Sairang inkar Rel kawngah hian Lei dawh lian (major bridge) 55 leh Lei dawh tenau (minor bridge) 87 a awm a. Hmun 32 laiah leiverh (tunnel) a awm a, leiverh zawng zawng thui/sei belhkhawm hi km 12.63 a ni a. Leiverh tunnel thui ber sei/thui zawng chu km 1.88 a thui a ni.

Bairabi to Sairang hi Rel kawng lian, Broad Gauge Railway Line tur a ni a. RITES-ten he Rel kawng sial Survey hna hi kum 2005 bawr khan an zofel a. Rel kawng siam hna hi sawrkar laipuiin kum 2008-2009 khan sanction-in hna hi kum 2015-ah khan thawh tan a ni a. Bairabi atanga intanin Sairang huam telin Rel Station pali a awm a. Chungte chu Bairabi ttanga a hlat zawng tehin, KM 16.38-ah Hortoki Rel Station; KM 26.10-ah Kawnpui Rel Station; KM 37.12-ah Mualkhang Rel Station leh a tawpna KM 51.38-ah Sairang Rel Station (Sihhmui) te an ni a. He Rel kawng siamna tur hian Prime Minister hian November ni 29, 2014 khan lung-phum a lo phum tawh a, Rel kawng hawn a nih hnu hian Rel pathum a service nghal dawn a ni.