Ngawrh lehzuala kawngpui siam tum a ni

Sairang leh Kawnpui inkar National Highway-06 siamthat hna chu Vawiin, August 5, 2025 atang hian ngawrh lehzuala thawh tum a ni.

Inrinni khan Home Minister K. Sapdanga leh Adviser to CM, TBC. Lalvenchhunga te chuan Sairang - Khamrang - Kawnpui inkar kawng siamthat hna thawh mek hi tlawhin Kawnpui leh Khamrang khawtlang hruaitute, MTOA leh Driver Association hruaitute nen inbiakna neih niin hmalak zel dan tur rel a. He huna ruahmanna an siam dan chuan Vawiin, August 4, 2025 atanga August 9 thleng khian ngawrh lehzuala kawng siam hna hi thawh tum a ni a, hemi chhung hian PWD leh NHIDCL ten an tha zawng zawng hmangin kawng siam hna an thawk ang.

Ruahman dan chuan kawng-a lirthei tangkhang mekte chu Mizoram Police ruahmanna hnuaiah nimin khan chhuahtir hman vek tur niin ke 14 nei (14-wheeler) chin chunglam erawh tlan phal a ni rih lo anga, an bungraw phurh pawimawh leh hmanhmawh thlak chu truck te zawka transit tur a hrilh an ni a. Thawhtanni atanga Nilaini (4-6, August) inkarah lirthei eng chi mah tlan phal a ni dawn lo a, hemi chhung hian 407 Truck chin hnuailam tan Tlang kawng (Kawnpui-Serkhan-Durtlang road)-ah tlan theih a ni ang. Hemi hun chhunga lirthei chetvel dan hi Aizawl leh Kolasib Traffic Police ten an vil dawn a; Adviser to CM TBC. Lalvenchhunga chuan Single Point of Contact niin kawng siam hna hi vilin Kawnpui, Khamrang, Mualkhang leh Sairang YMA ten hnatlangin kawng siam hna hi an thawhpui bawk ang.