AMC Ward No V-ah Know Your Citizen hmang dawn

Aizawl Municipal Corporation (AMC) Ward No-V Corporator Rosiamngheta chuan an Ward chhung mipuite nihphung hriatna tur ‘Know Your Citizen’ (KYC) software an siam thu leh hemi hmang hian Ward chhung mipuite nihphung lakkhawm nghal a nih dawn thu a sawi.

Inrinni-a Aizawl Press Club-a thuthar thehdarhtute a kawmna ah he thu sawiin Corporator Rosiamngheta chuan khawvelah ram hmasawn leh changkang apiangin Data an ulukin an neih chikim thin thu leh an khua leh tuite an chhinchhiah fel thlap thin thu a sawi a. Hei hi hmasawnna pawimawh tak a nih thu leh data tha leh chhinchhiahna mumal neih a pawimawh thu a sawi a. Heng Data pawimawhna hi hriain AMC Ward No. V Commitee chuan ngun taka a ngaihtuah hnuah Ward chhunga hman turin ‘Know your Citizen’ tih software chu siamin hman a remti tih a sawi a ni.

AMC Corporator Rosiamngheta chuan an software chu a la kimchang lo hle tih pawh sawiin, hmabak la awm pawh kawng hrang hranga tih hmasawn ngai a nih thu leh tunah rih chuan a bultanna ang chauh a la nih dawn thu a sawi a. He Software ah hian Ward chhunga Veng hrang hrang mipuite nihphung pawimawh zualpui chu dahluh tum a nih thu sawiin, hei hi Local Council ten tul an tihna ah khua leh tuite mamawhna ah an hman dawn thu a sawi a, vantlang luhchhuah nuai nuai theiha siam a phalrai tur erawh a nih loh thu a sawi a ni. 

Software chu khawtlang chhiarpui anga sawi theih niin kum bithliah, thiamna, eizawnna, House No, Phone No, Epic No Section leh thil hrang hrangte pawh a awm nghal vek dawn thu a sawi a. Pem lehkha issue thlengin leh an pemna thlenga hriat zui theih turin a dahtha dawn tih a sawi a. Thilsual ti te chhuina, Criminology atan pawh thil pawimawh tak a ni chho tura a ngaih thu a sawi a ni.