Kumin ah ASF vangin Vawk 7,027 a thi tawh

Mizoram-ah kumin chhungin Vawk pul hri, African Swine Fever (ASF) vangin Vawk 7,027 a thi tawh.

AH & Vety Department chhinchhiah danin kumin-a ASF hri hmuh thar leh a nih hnuah ASF vanga Vawk thi leh suat a awm deuh reng a, pung hluai chuang lovin a khat tawkin Vawk thi leh suat hi an awm reng a. Inrinni thleng khan Vawk thu leh suat hi la awmin heti hian kumin ah ASF avanga Vawk thi chu 7027 tling tawhin Vawk 2,709 zet suat a nih tawh thu an sawi bawk. AH & Vety Department hotute hnen atanga thudawn danin ASF hi Mizoram chhunga District pasarih- Mamit, Lawngtlai, Siaha, Lunglei, Khawzawl, Champhai leh Hnahthial-ah te a leng mek a, heng District-a khaw 115-ah ASF hi hmuh a ni tawh a ni.

District hrang hrang zingah Siaha District a tibuai nasa ber a, an District chhunga khaw 38-ah ASF hi a leng a. Lunglei District-ah khaw 30, Lawngtlai District-ah khaw 18, Khawzawl District-ah khaw 12, Hnahthial District-ah khaw 8, Champhai District-ah khaw 5 leh Mamit District-ah khaw 4-ah te a leng mek a. AH&Vety Department hotute chuan ASF hi State dangah chuan nitin nuna a awm reng chunga khawsakpui thiam mai lam zawngte pawhin rilru an pu tawh niin an sawi a ni.