Sept. 9-ah Vice President thlanna neih a ni dawn

India ram Vice President thlanna chu thla thar September 9 khian neih a ni dawn tih Election Commission of India chuan a puang.

Vice President thlanna neih dan tur hi Election Commission of India chuan puangin he inthlanna neih tura hriattirna chu tun thla ni 7-ah tihchhuah a ni anga, inthlan chuh tumte tan August 21 thleng nomination paper thehluhna hun hawngin hming pekluh te chu August 22-ah enfiah a ni anga, inhnukdawk duhte tan August 25 thleng hun hawngin September 9, 2025-ah Vote thlak a ni anga, Vote tla te chhiar nghal turin niin result pawh puan nghal a ni ang.

Vice President thlanna neih tur atana Electoral College List pawh a tifel tawh tih ECI chuan sawiin, Vice President hi Rajya Sabha leh Lok Sabha Member ten an thlang thin a, a vaia Vote nei thei zat chu 788 niin Electoral College-ah hian Rajya Sabha-a Elected Member 233 leh Nominated Member 12 bakah Lok Sabha-ah member 543 an awm mek a. Rajya Sabha-ah hian seat hnawhkhah loh panga leh Lok Sabha-ah pakhat a awm a, hei vang hian tun dinhmuna Vote nei thei chu 782 an ni.

Election Commission of India chuan Rajya Sabha Secretary General PC. Mody chu Vice Presidential Election 2025 lo awm turah Returning Officer atan a ruat a, Rajya Sabha Secretariat-a Joint Secretary Garima Jain leh Rajya Sabha Secretariat Director Vijay Kumar te chu Assistant Returning Oficer atan ruat an ni bawk.

Tarlan tawh angin India Vice President Jagdeep Dhankhar chu thla kalta July 21 khan a hriselna a that tawk loh vangin a bang thut a, hei vang hian India Vice President 17-na thlanna hi neih a ni dawn a, India khua leh tui, kum 35 aia naupang lo tan he inthlanna hi chuh theih a ni dawn a ni.