Ramri-ah ngawrh lehzuala Duty turin Police te hriattir

Assam leh Mizoram ramri dep-a Police duty te chu ramri-ah ngawrh lehzual zawka duty turin hriattir an ni a, hei hi Assam sawrkarin ramdang mi dan lova an State-a awm te a hnawhchhuah mek vang a ni.

Vairengte Police Station atanga thudawn danin, ramri-a duty Police/IR Sipai te chu a hma zawng aia ngawrh lehzual zawka duty turin hriattir an ni a, Vairengte Checkgate-a duty te pawh Assam atanga dan lova lo lut an awm leh awm loh uluk taka enfiah turin hriattir an ni bawk a. Thudawnna in a sawi danin, Assam leh Mizoram inrina hmun hrangah ngawrh taka duty kalpui a nih mek lai hian, he thu ziahlai thleng hi chuan India khua leh tui ni lo, Assam sawrkarin a hnawhchhuah Mizoram-a lolut an awm hriat a la ni lo a, chutiang ang chi manchhuah pawh an la awm lo a ni.

Tarlan tawh angin tunhnaia Central YMA Executive Committee thukhawm chuan Assam sawrkarin an State chhunga dan lova ramdang mi (Bangladesh atanga lut) awm an hnawhchhuahte Mizorama an rawn luh lohna tura hmalak dan tur an ngaihtuah a. Assam atanga hnawhchhuah te chu Assam thenawm State-a an luh lohna turin State dangte'n hma an la mek tih sawiin, “Kan State-ah pawh engemaw zat rawn lut ve thei an nih avangin lo inven dan turah sawrkarin ruahmanna a la siam lo a nih chuan, siam thuai tur leh ILP pek chhuah kawngah fimkhur lehzual turin kan ngen,” an lo ti tawh a ni.