Zawhna inang chhang turin ruahmanna kalpui mek

Mizoram sawrkar hnuaia zirna In-a pawl 3 atanga pawl 8 zirlai zawng zawngte'n zawhna inang an chhan theih nan ruahmanna kalpui mek a ni.

Zirtawpni khan School Education Minister Dr. Vanlalthlana hovin an Department hnuaia hmalaknate thlirletna hun, Quarterly Review Meeting vawi 4-na chu Mizoram Secretariat-a SAD Conference Hall-I ah neih a ni a, he hunah hian pawl 3 atanga pawl 8 zirlai zawng zawngte'n zawhna inang an chhan theih nan ruahmanna kalpui mek anih thu sawilan anih bakah School Syllabus-a spoken Hindi telh chungchangte, Department inrelbawlna chherchhuan dan (Administrative set-up) chung-chang te, huamzau taka zirlai naupangte hmasawnna tehna Holistic Progress Card (HPC) chungchangte, pawl 8 chin hnuailam Elementary Education-a textbook thar hman chungchangte, pawl 9 atanga pawl 12 inkar Secondary leh Higher Secondary Education syllabus-a Subject dah belh chungchangte leh District hrang hrang atanga thurel tur lutte sawiho a ni. 

Hei bakah hian Mizoram Education (Transfer & Posting) Rules, 2020 chungchanga July ni 18, 2025-a Public Consultation meeting neih tura ruahmanna neih anih thu ngaihthlak a ni a. Draft rules hi School Education Department website atanga download theih a nih thu leh rawtna leh sawiduh nei tan July ni 11, 2025 (Zirtawpni) thlenga MERC email, merc.mizoram@gmail.com-a thehluh theih a nih thu tarlan a ni bawk.

Hetihlai hian School Education Department chuan School tan Hun (timing), School Calendar leh Common School Uniform chungchang ah Public Consultation Meeting chu Vawiin chawhma dar 11:00 hian Directorate of School Education Conference Hall-ah buatsaih an tum bawk.