Serchhip-a Independence Day hman dan tur rel

Thla thar August 15 khian India Independence Day chu rampumah lawm a ni leh dawn a, Serchhip-a he ni lawm dan tur hi nimin khan District Bawrhsap hovin sawiho a ni.
Serchhip DC Meeting Hall-a thutkhawm ah hian Serchhip-a India Independence Day lawmna ah hian Supply Minister B. Lalchhanzova chu khuallian a ni dawn tih tarlan niin Serchhip Sports Complex-ah zing dar 10:00-ah programme tan a ni ang. Kumin hian March past-a tel tur zingah School Contingent 14, Scouts and Guides, NCC leh Ex-Servicemen te tel thei tura beisei an ni a. Heng bakah hian Thenzawl Police Training School atangin  Armed Contingent tel thei tura beisei an ni bawk.

Hemi ni hian sawrkar Office zawng zawng te chu zing Ni chhuah atanga tlai thleng anmahni Office theuhah Hnam Puanzar zar tura hriattir an ni a. VIP’s at Home chu Independence Day lawmna programme neih zawhah DC Bungalow ah neih a ni ang. Kum danga tih thin angin he ni pual hian Serchhip-a Home, Hospital leh Jail-ah te thilpek sem a ni leh anga, Independence Day pual Football Tournament leh Table Tennis Tournament neih a ni dawn bawk a ni.

Serchhip-a India Independence Day lawmna hi mipui a duh apiangin TV leh youtube kaltlanga an en theih nan live a pechhuak tura beisei an ni a, Serchhip-a Information & Public Relations Department Youtube Channel-ah live-a pekchhuah a ni dawn bawk a ni.