New Serchhip area-ah bawlhhlawh thliarhran kalpui tan tur Bawrhsap hovin sawiho a ni

Serchhip khawpuiah bawlhhlawh thliarhran leh sawngbawl chu a taka kalpui tum a nih tak avangin nimin khan New Serchhip area-a Village Council leh tlawmngai pawl hrang hrangte chu Bawrhsap Paul L. Khuma chuan kawmin hemi chungchang hi a sawipui.
Sawrkar chuan a hma lama ruahmanna a lo siam tawh angin Serchhip khawpuiah bawlhhlawh thliarhran leh sawngbawl chu a taka kalpui tan a tum ta a, a bul tanna (Pilot Project) atan New Serchhip Area chu thlanchhuah a nih avangin Serchhip District Bawrhsap Paul L Khuma hovin nimin khan New Serchhip area-a Village Council leh tlawmngai pawl te chuan Serchhip DC Meeting Hall-a hemi chungchang hi an sawiho a ni. He sawihona hunah hian Bawrhsap Paul L. Khuma chuan bawlhhlawh sawngbawl kawngah Serchhip-in bung thar a kai dawn tih sawiin, chumi tihhlawhtlinna tur chuan a bul tan nan New Serchhip chu thlan a nih thu a sawi a. He hmalakna hi ‘mi tlemte rorel, mipuia barh tumna’ a ni lo tih Bawrhsap chuan sawiin, “Huamzau taka inrawnkhawma, he hmalakna hi kalpui tum a nih avangin New Serchhip area-a VC member zawng zawngte leh tlawmngai pawl awm apiang te, an zavaia kohkhawm an ni,” tiin tuna an hmalakna chu a sawifiah a ni.

Bawrhsap chuan Bawlhhlawh sawngbawl kawnga hmalak an tum dan hi mipuiah chiang taka hrilhfiah a, inhriatthiam lohna leh dodalna te a awm lohna tura zirtirna tha pe turin he huna kalkhawm te chu a ngen a. Mipuite tel loin he hmalakna hi engti kawng zawng maha a hlawhtlin theih loh thu pawh Bawrhsap chuan sawiin, thawhhona tha tak nen, mi dangte tan pawha entawntlak tura he hmalakna hi tihhlawhtling New Serchhip mipuite chu a ngen a ni.

Serchhip District thuneitute kaihhruaiin Serchhip District Urban Development Office (DUDO), Public Health Engineering (PHE) Department leh Greenherd Pvt. Ltd. te chuan bawlhhawlh sawngbawlna a takin Serchhip-ah kalpui tan an tum a. He hmalakna hian Serchhip khawpui pumpui a huam dawn a, a bul tanna atan New Serchhip thlanchhuah niin August thla tir atangin New Serchhip huamchhunga chengten anmahni In theuhah an bawlhhlawhte an thliarhran a ngai tawh dawn a ni.

Ruahman ang chuan Greenherd Pvt. Ltd te leh UD&PA te chuan bawlhhlawh lakkhawm leh paih hna an thawh dan her danglamin, chhungkaw tinte kawtkai-ah bawlhhlawh hi an lakkhawm sak thin anga. Bawlhhlawh tawih thei (Wet) leh tawih thei lo (Dry) te chu bawm hrangah dahin mahni In theuhah thliar hran tur a ni tawh dawn a. Greenherd Pvt. Ltd te chuan an bawlhhlawh sawngbawlna hmun New Serchhip Lungrual ramah bawlhhlawh hi an lakhawm anga. Sawrkar dan zawm chungin mipui hrisel zawkna tur leh thianghlimna kawnga hma kan sawn theih nan bawlhhlawh mumal takin an tiral tawh dawn a ni.