Serchhip District-a BLO tan Training neih tan a ni
Election Commission of India chuan July 2 atang khan ‘National Training Programme for Booth Level Officers’ hi ramchhunga BLO te tan nei turin ruahmanna a siam a, he Training hi tun thla ni 17 thlenga neih tura ruahman niin Assembly Bial hrang hrangah BLO te tan Training hi neih tur a ni a. Serchhip District-ah chuan a hmasa ber atan nimin khan 26-Serchhip ST (AC) huamchhunga BLO te tan Bawrhsap Pisapui Hall-ah Training hi neih a ni a, District Election Officer Paul L. Khuma chuan he Training hi a telpui a ni.
Training hawnna ah hian District Bawrhsap chuan inthlang ram kan nih angin Election hi a pawimawh em em tih sawiin, Election dik leh felfai neih a nih theihna tura sawrkar kutke ber chu Booth Level Officer-te an ni, a ti a. BLO te chu dan leh dun, inkaihhruaina leh Election kaihhnawiha sawrkar thuchhuak te hre bel hle turin a chah a. “Election hi a khirh a, a hremna pawh a na a; chuvangin mipui rawngbawlna atana an mawphurhna tha taka hlen tur chuan hna an thiam a, an hriat bel a ngai,” a ti a. Nimin-a training an neih tur pawh rilru leh tihtakzeta hun hmanga, thiamna leh hriatna thar hawn ngei turin a fuih bawk a ni.
Serchhip Assembly Bial chhunga BLO te tana Training hi Election Officer Lalchhanhimi chuan kaihruaiin Thenzawl SDO (C) K. Lalhlim-puia chuan thu a sawi bawk a, 26-Serchhip (ST) A/C-a AERO Dr. Marilyn Lalruatkimi bakah Official dang ten thupui hrang hrang hmangin Serchhip Bial chhunga BLO kalkhawmte chu an zirtir a ni.
Ruahman lawk ang chuan BLO te tana Training hi Vawiin hian 27-Tuikum (ST) A/C te tan Chhingchhip-ah neih a ni anga, naktuk-ah 28-Hrangturzo (ST) A/C te tan East Lungdar-ah neih lah tur a ni ang.
Comments
Post a Comment
I ngaihdan i sawi hian mipui ngaihdan i tarlang a ni!