Rannung seh natna-ah Ph.D degree hmu thar

Serchhip Field Veng-a cheng Zachhunga fapa tuna Durtlang Leitan-a khawsa mek, Lalfakzuala Pautu chuan Mizoram a natna lar ber te zinga mi ‘Rannung seh natna’ kan tih mai, Scrub Typhus natna zirchianna a neih atangin Ph.D degree a hmu.
Lalfakzuala Pautu hian Dr. Vanramliana, Associate Professor, Department of Life Science, Pachhunga University College kaihhruaina hnuaiah research hi a bei a, a Thesis thupui chu ‘Epidemiological Study and Vector Identification of Scrub Typhus Disease in Mizoram, North-east India’ tih a ni a, he a zirchianna ah hian Mizoram chhunga rannung seh natna hri len dan chungchang- khawi hmunah te nge a tam a, eng hnathawk in nge vei tam ber, kum engzat in nge vei tam, eng hunlaiin nge he natna hi a tam bik tih te, a natna lanchhuah dan te leh mi engzatin nge thihpui tih te zirchianna a neih bakah Mizo-ram a Scrub Typhus natna hrik thehdarhtu rannung hmuhchhuahna leh nemnghehna PCR khawl hmangin a nei bawk a ni.

Thudawn danin Lalfakzuala Pautu hi Pachhunga University College (Mizoram University) atanga Full Time Ph.D degree zirchhuak hmasa ber a ni a, a Research neihna Field-ah pawh hian Mizoram-ah chuan a hmasa ber nia hriat a ni bawk. Amah hi Mizoram sawrkar a Health & Family Welfare Department hnuaiah Entomologist hna thawk mek a ni bawk.