Thenzawl-a Solar Plant panna kawng siam MSPMC ten a hmunah an enfiah
Mizoram-a sawrkar hmalakna hrang hrangte a hmuna enfiahtu Mizoram State Project Monitoring Committee (MSPMC) hian nimin khan MSPMC-a Member Er. H.Laldintluanga hovin Thenzawl-a Solar Plant panna kawng siam hi an endik a, he hunah hian Vanchhungi, Task Force, MSPMC leh Vannunmawia, PS to Vice Chairman, MSPMC-te bakah PWD leh Vantawng Group YMA hruaitute an tel a. MSPMC aiawhte chuan nimin-a hnathawh an endik cbhu an hmuhdan te MSPMC Chairman, Chief Minister ni bawk Lalduhoma hnenah an thehlut dawn tih sawiin, Mizoram-a project hnathawh hrang hrangah Quality Control ngaihthah thin a nih thu leh ngaih pawimawh ni thin se an duh thu an sawi a ni.
Vantawng Group YMA-a Vigilance & Monitoring Sub-Committee chuan July 5, 2025 khan Vantawng khawhthla peng kawng chhun thar leh Solar Plant kawng siam zawh tawhte hi an lo tlawh tawh a, Vantawng Khawhthla atanga Solar Plant kawng chu a hmun thlengin a chhe nghal hle tih an lo sawi tawh a, hetianga Fûr khat pawh daih lo a kawng siamtute hi an dem thu sawiin, Thenzawl khua in hetiang hmun pawimawh an neih panna kawng hetianga chhia-a an siam chu mipuite zahlohna lian tak nia an hriat thu an sawi a. Helai hmunah hian Side drain-ah tui a luan theih loh avangin kawng a tichhe nasa nia sawiin, “Fûr ah tuihawk leh lung thil tam avangin kal a harsa hle a, nipui-ah heng lung thil te hi motor tana hlauhawm tak anih leh dawn avangin hetiang a chhia a kawng an siam hi a pawi hle a ni,” tiin an lo sawi tawh a ni.
Nimin-a helai hmun tlawha MSPMC te nen an inkawmna ah Vantawng Group YMA Vigilance & Monitoring Sub-Committee hruaitute chuan Solar Plant panna kawng chu tun aia tha zawka siam leh ngei nise an duhthu an sawi a, P&E Department hotute pawhin kawng tha lo chu siamthat a nih theih nan an ngaihven zui zel dawn tih an sawi bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!