National Mission on Natural Farming hawnna nei

Lunglei High Powered Committee (HPC) Vice Chairman V. Malsawmtluanga chuan nimin khan Lunglei District tan 'National Mission on Natural Farming (NMNF) 2025-2026' chu a hawng.

Lunglei District Agriculture & Farmers Welfare Department huaihawta BCM Hall, Serkawn-a NMNF hawnna inkhawmah hian HPC Vice Chairman chuan Mizoram sawrkarin kuthna-thawktute dawm kan a ngai pawimawh hle tih sawiin, Central leh state sawrkar kaltlangin kuthna-thawktute dawmkanna leh hmalakpuina tur rua-hmanna kalpui a la ni zel dawn tih a sawi a. Kut hnathawktute chu sawrkarin phur taka hma a lakpui theih nan puih tlaka hna thawk tur leh sawrkar hmalaknate tawiawm zel turin a chah bawk.

NMNF Scheme hi India rama leilung dan mila Lo neih dan tlo, him leh hrisel a awm theih nana hmalakna niin thlai chinna leilung tihthat leh tihhrisel te, chhehvel leilung, ngaw leh nungcha chereu tawh siam that te leh kut hnathawktute senso tihtlem te a tum a ni a. Lei, tui, ngaw, thlai, ran, ramsa, sik leh sa leh mihring te mamawh inphuhruk tawn thei tura thlai chin leh ranvulh kal kawppuina tur niin thlaite chu damdawi (chemical) tel lova, ran ek leh hnim tawih leitha (organic manure) hmanga chawma ranchaw tur pawh thlai tharchhuahte'n phuhruk tel nghal thei tura kawng kal nei taka hmalakna tur a ni.

NMNF 2025-2026 hnuaiah hian Lunglei District-ah Zau (Cluster) 15-ah hmalak phawt tur niin zau khatah hian khaw 4/5 vel zel a awm anga, a vaiin khaw 65-ah hmalak a ni dawn a. Zau tin atan kuthnathawktute zirtira kaihruai thei tur, Cluster Resource Person (CRP) pahnih theuh ruat tawhin, training pawh pek tawh an ni bawk.

Nimin-a NMNF hawnna hun hi Lunglei DAO VL. Hmangaihchhunga chuan kaihruaiin mi 80 vel an tel a, NMNF kalpui dan tur zirhona neih chhunzawm nghal a ni bawk.