Indian Red Cross Society Mizoram State Branch tharthawhna Larsap hovin neih a ni

Indian Red Cross Society (IRCS), Mizoram State Branch chu tharthawh leh niin nimin khan Govt. Aizawl College, Mualpui-ah hemi pual hian hun hman a ni a, he hun hi Larsap chuan hmanpuiin Mizoram-a Youth Red Cross Unit din hmasa ber Govt. Aizawl College leh a pahnihna Govt. T. Romana College-te hnenah Institutional Membership Certificate a hlan bawk.

IRCS Mizoram State Branch tharthawhna leh an hmalakna tura duante tlangzarhna hunah hian Larsap Gen.(Dr) Vijay Kumar Singh chuan IRCS Mizoram State Branch tharthawh a ni leh hmalakna turte tlangzarh a ni ta chu lawmawm a tih thu sawiin, he hun hi Mizoram tana hun pawimawh tak, mahni mihring puite tana rawngbawl kawnga hmalakna awmze nei leh intuaitharna a ni, a ti a. Mizoram chu tlawmngai pawl chak leh viak tha tak tak awmna a nih thu leh engmah phutlet nei hauh lova midangte puih duhna thinlung chu Mizo nuna bet tlat a nih thu a sawi a, puih ngai an awm apianga khawtlang huapa chetchhuah a ni thin chu thil thar a nih loh thu leh chhuanawm a tih thu a sawi a. Midang lainat leh pui thin khawtlang ni mah ila, midangte rawngbawl sak kawnga khawvel puma pawl hriat hlawh leh awmze nei taka kalpui, IRCS Mizoram State Branch kan neih belh hmang hian rawngbawlna kan tichak lehzual thei dawn niin a sawi bawk.

IRCS Mizoram State Branch President ni bawk General (Dr) Vijay Kumar Singh (Retd) chuan Youth Red Cross Unit hmasa ber Govt. Aizawl College leh a pahnihna Govt. T. Romana College-ah te din a ni chu lawmawm a tih thu sawiin, College leh zirna In hrang hrangte chu Youth Red Cross Unit din chho zel turin a sawm a. Mizo thalaite chu Red Cross zawma an hun hlu tak, thiamna leh chaknate Red Cross hnuaia hmalakna hrang hrangah hmang tangkai turin a fuih a. Red Cross chu pawl mai ni lo, beiseina eng chhinchhiahna a nih thu sawiin, Mizoram chu India ram puma Red Cross Model State ni tura tanlak a duh thu a sawi bawk.

He hunah hian IRCS Mizoram State Branch Chairman H. Lalengmawia chuan IRCS Mizoram State Branch thar thawh leh nana hmalak dante tarlangin, hemi kawnga Governor hmalakna fakawm a tih thu a sawi a. Mizoram-ah Red Cross Society changtlung leh nung tha tak nei tura hmalak chhoh mek zel a nih thu sawiin, College hotute chu Youth Red Cross Unit din tura tan la theuh turin a chah a ni.

Hemi hnu hian Mizoram-a Youth Red Cross Unit ding hmasa ber, Govt. Aizawl College Youth Red Cross Unit member-te tana buatsaih, Basic Life Support (BLS) leh First Aid Training neih zui nghal a ni a. Govt. Aizawl College Youth Red Cross Unit-te hian IRCS Mizoram State Branch atangin Blanket 30 leh Oxygen Concentrator an dawng a ni.