Mizoram-ah Zirtirtu indaihlohna a nasa; Midang kheuhtu awmin harsatna a thlen niin hria

School Education Minister Dr. Vanlalthlana chuan Mizoram-a Zirtirtu indaihlohna a nasa tih sawiin, tul leh mamawh avanga Zirtirtu sawn an nihin midang kheuhtu an awmin harsatna a thlen phah thin tih a sawi a, hetiang hi a awm tawh loh nan hma an la dawn tih a sawi bawk.

Nimin-a a Office-a thuthar thehdarhtute a kawmna ah School Education Minister Dr. Vanlalthlana chuan School tinah Zirtirtu indaih neih vek an duh thu leh Headmaster pawh inpek vek an duh tih sawiin, “Kan dinhmun erawhin a zir ngang lo a. Tunah hian Elementary (Primary leh Middle) School chinah Zirtirtu nghet 2,936 kan neih mek laiin post ruak hi 3,296 lai kan nei a. Contract, MR Teacher leh Casual Teacher kan neih zat chu 1,647 lai a ni thung. Tichuan, Elementary School-a kan indaihlohna chu 1,649 a la ni ta tho a ni,” a ti a, Primary School-a Casual Teacher 234 la leh tura hmalakna awm mek leh Transfer and Posting Rules 2025 an buatsaih mek chuan hmun tam taka kan indaih lohna a tihziaawm an beisei tih a sawi. 

Education Minister chuan Secondary School (High School leh Higher Secondary School) lamah chuan tlemin an indaih hret tih pawh sawiin, “Maths leh Science zirtirtu erawh kan indaih lo viau mai a. Hei hian nasa takin harsatna min siam a, nawrhna pawh a thlen tam ber a ni. Hindi Teacher tam tak hi sawrkar School-ah awm lovin Private School a awm an awm nual a. Sawrkar School-a kan indaihloh em em laia Private emaw, Aided School-a lo dah hi a fuh kan ti lova. Sawrkar School-ah semrual phawt a, chumi hnua Aided School-a dah phawt tha kan tih avangin an chungchang pawh ngaihtuah leh mek a ni,” a ti.

School Education Minister chuan Zirtirtu bakah Department Officer (CEO, SDEO, DEO) sawn chu a thleng fo tih sawiin, tunhnaia Transfer Order an siamah Order sut leh tura nawrna an dawng nasa tih a sawi a, “Transfer dilna hi nitin dawn thin a ni a. Awm kan tih pui leh an School kalsanin tuar lo tura kan ngaihte chauh kan sawn. An School kalsanin tuar dawna kan hriat chuan a hnawhkhahna tur kan zawng tel thin a. Transfer hi a nazawngin kan ti lem lo. Kan tihna thenkhat ah Zirtirtu thenkhatin hah ta viaua an inhriat avang leh School dinhmun tarlang duh lem lovin School dan leh nawrhkhum kan tawk ta zel a ni,” a ti a. Zirtirtute zingah insawn hreh avanga khawtlang emaw, pawl lo dawr an awm thin tih pawh sawiin, hetianga ti tawh lo turin Zirtirtute chu a hriattir nghal a. “Kan hmalakna hi thuneihna kan chan tak avanga ti chiam kan ni lo a, Zirnain zirtirtu inkhairual lo avanga a tawrh nasat em avangin a kilkhar bera awmte nat rual kan nat ve vang a ni tih hi Zoram mipuite ka hriattuir duh a. Tuna Transfer & Posting Draft Rules, 2025 kan phochhhuah mek pawh hi ngun taka min zirchian sak a, rawtna tha tak tak rawn thehlut turin mitin kan sawm a ni,” a ti bawk.