Chhanchhuahna hmanrua semchhuah a ni

Disaster Management and Rehabilitation Department hmalaknain khuarel chhiatna a lo thlen thulha hman tur inchhanchhuahna hmanrua chi hrang hrang semchhuahna hun chu nimin khan neih a ni.

Heng hmanrua te hi Directorate of Disaster Management and Rehabilitation Conference Hall atanga semchhuah niin Khuarel chhiatna chi hrang hrang a lo thlen thulha hman tangkai tur hmanrua chi 24- Military tent (8), Stretcher (18), Life Jacket (55), Head torch (45), Megaphone (28), First Aid kit (38), Hruizen (50 & 100m a vaiin 86), Torch light (43), Helmet (37), Rubber boat pahnih semchhuah tawh bakah Kham-rang VDMC hnenah, Gazebo tent 12) leh leh thil dang chi hrang hrang bakah Ralkhel dar lian 12 leh a te 87 sem chhuah a ni a, heng hmanrua semchhuah te hi a bikin tuitla chhanchhuahna leh a zawnna kawng a hman tur te, khampang leh inchhawng sang atanga inchhanchhuahna turte a ni tlangpui a. Indian Red Cross Society, Mizoram State Branch ten Disaster Management and Rehabilitation Department hnena Blanket 300 an hlan chu Champhai District a hman turin an pe nghal bawk a ni.

Nimin-a heng bungrua semchhuahna hunah hian DM&R Minister Prof. Lalnilawma chuan DM&R Department-a thawktute, State Disaster Response Force, District Disaster Management Authority leh chhanchhuah hna thawka chechhuak thin khawtlang leh NGO hrang hrangte chu khawtlang thlamuantu, Zonun zemawi tlawm-ngaihna leh huaisenna pholang thintute an nih thu sawiin, ram leh hnam tana hna ropui tak thawktute an nih thu a sawi a. Khuarel chhiatna thleng avanga hmun hrang hranga chhanchhuah hna thawktute thawmthat lehzualna tur hmanraw chi hrang hrang sem theih a ruahmanna siam a ni chu lawmawm a tih thu a sawi bawk.