Chief Minister in BSNL leh HRDS hotute a kawm

New Delhi-a cham mek Chief Minister Lalduhoma chuan BSNL hotute leh Highrange Rural Development Society (HRDS) hotute kawmin Mizoram tana hmalakna tur hrang hrang a sawipui.

Chief Minister Lalduhoma hi BSNL-a CMD, Robert J Ravi chu New Delhi-a Mizoram House-ah kawmin India ram khawpui lian hrang hranga BSNL-in ram awl neihah te MoU Mode-a Mizoram House leh Hostel sak dan tur te an sawi a, chak taka hmalak zui nise an ti. Mizoram Village Council tina Optic Fiber Drop-In siam chungchang te, Mobile Signal la awm that lohna khuaa 4G Tower din belh chungchang te pawh an sawidun a. Zirlai ten awlsam zawka online exam an kalpui theih nan BSNL chuan Mizorama an Telephone Exchange tinah Online Exam Center din turin Chief Minister hian a hrilh bawk. Hei bakah hian Universal Services Obligation Fund (USOF) kaltlanga Multi Tasking Telecom Technician te hnena training pe tura hmalak dun theih dan kawng te pawh an sawi dun a ni.

Chief Minister hian Highrange Rural Development Society (HRDS) hotute pawh niminpiah khan Mizoram House-ah kawmin Mizorama mi harsa zawkte tana chenna In sak theih dan kawng an sawiho a, HRDS India hian programme pakhat ‘Sadhgraha’ an tih chu kalpuiin, tribal mipui, chenna In tha neilo te tana chenna In tur sak chu an pawl thiltum lian ber a ni a. Kum 2029 ralhma ngeiin India ram pumah Tribal te tan chenna In nuai 100 din sak hman an tum mek. An hotute chuan Mizoram chhungah pawh zirchhianna an neihfel tawh thu leh Phase I atan chenna In 5000 vel sa tura hmalak an inpeih thu an sawi a. A tul angin a theihna zawnah hma a lo lakpui zel tur thu Chief Minister hian HRDS India hotute hi a hrilh a ni.