Hnahthial-ah Bana Kaih Progress Partners kokhawm

Nimin khan Hnahthial-ah Chief Minister's Special Package hnuaia Bana Kaih Progress Partners te tan an hriattur tulte inhrilhhriatna hun neih a ni a, he hun hi Bawrhsap K. Vanlalruati chuan hmanpuiin tanpuina an dawn chhan ang ngei, mahni trade thlanah theuh thahnem ngai taka thawk tura chahin, a hlawkna chharchhuak ngei thei tura theihtawp chhuah turin a chah bawk a ni. Hnahthial-a CM Special Package hnuaiah hian tanpuina dawng tur Agriculture-ah 7; Horticulture-ah 12; Sericulture-ah 2; Soil & Water Conservation-ah 8, Animal Husbandry & Veterinary-ah 25; Fisheries-ah 13 leh Commerce & Industries-ah 23 te awmin Progress Partners hi an vaiin 90 an awm a. Trade mal-ah Vawkvulh (Piggery) thlang tam berin mi 21 in a thlang a ni.

CM Special package hnuaiah hian Mizo khua leh tui dik tak, kum 18 aia upa, Sawrkar hnathawk lo, sumdawnna ngelnghet neilo mai bakah an trade thlan ti hlawhtling tura thiamna neite tan tanpuina sumfai dawn theih a ni a. CM Special Package grant hi Sawrkar Line Department hrang hrangte hnenah pekchhuah tur niin chuta tang chuan hamthatna dawngtu turte Bank Account-ah direct-in (Direct Benefit Transfer) thun a ni anga. Line Department ten Progress Partners te hi an vil zui dawn bawk a ni.